ماؤنواز سیاسی پارٹی کی حمایت کرنے پر نیپال نے احتجاجاًبھارت سے اپنا سفیر واپس بلالیا

ہفتہ 7 مئی 2016 20:50

کھٹمنڈو(اُردو پوائنٹ اخبارتازہ ترین - این این آئی۔07 مئی۔2016ء) نیپال کی حکومت نے ملک کے ماؤنواز سیاسی پارٹی کی حمایت کرنے پر نئی دہلی سے اپنا سفیر واپس طلب کر لیا ہے۔ اس کے علاوہ پرسوں پیر سے نیپال کی خاتون صدر بندیا دیوی بھنڈاری کے بھارت کے پہلے دورے کو بھی منسوخ کر دیا گیا ہے۔

(جاری ہے)

میڈیارپورٹس کے مطابق نئی دہلی اور کھٹمنڈو حکومتوں کے درمیان تازہ کشیدگی کی وجہ ماو نواز سیاسی پارٹی کی طرف سے موجودہ مخلوط حکومت کی حمایت ختم کرنے کا اعلان تصور کیا جا رہا ہے۔ سیاسی و سفارتی حلقوں کے مطابق اِس سیاسی پیشرفت کو بھارت کی حمایت حاصل ہے۔ نئی دہلی میں نیپالی سفیر کو بھی اِسی بنیاد پر واپس طلب کیا گیا ہے کیونکہ وہ بھی اپوزیشن کی حمایت میں تھے۔