ملالہ یوسف زئی کی زندگی پر بننے والی بھارتی فلم ’گل مکئی‘ کا پوسٹر سوشل میڈیا پر جاری

بدھ 6 ستمبر 2017 16:06

ممبئی (اُردو پوائنٹ اخبارتازہ ترین - آن لائن۔ 06 ستمبر2017ء) ملالہ یوسف زئی کی زندگی پر بننے والی بھارتی فلم ’گل مکئی‘ کا پوسٹر سوشل میڈیا پر جاری کردیا گیا۔

(جاری ہے)

بھارتی میڈیا کے مطابق لڑکیوں کی تعلیم اور انسانی حقوق کے لیے آواز بلند کرنے والی پاکستانی طالبہ ملالہ یوسف زئی کی زندگی پر مبنی فلم پوسٹ پروڈکشن کے مرحلے میں ہے جس کی ہدایت کاری امجد خان دے رہے ہیں جبکہ فلم میں ملالہ کا کردار بھارتی چائلڈ اسٹار ریم شیخ ادا کر رہی ہیں، فلم اسٹار دیویا دت اور آنجہانی بھارتی اداکار اوم پوری فلم کے نمایاں کرداروں میں شامل ہیں۔

فلم کے پروڈیوسر آنند کمار کا کہنا ہے کہ اوم پوری کی آواز میں ریکارڈ کیا ہوا گانا بھی فلم میں شامل ہے جو اٴْن کی یادوں کو تازہ کر دے گا جب کہ ریم شیخ نے کہا کہ وہ ملالہ کا کردار نبھاتے ہوئے بہت نروس تھیں کیونکہ ملالہ یوسف زئی عالمی شہرت کی حامل شخصیت ہیں۔