زرداری کے حواریوں اور الطاف کی باقیات سے نجات کا وقت آن پہنچا ہے، عمران خان

جمعرات 14 دسمبر 2017 13:37

اسلام آباد (اُردو پوائنٹ اخبارتازہ ترین - آئی این پی۔ 14 دسمبر2017ء) پاکستان تحریک انصاف کے چیئرمین عمران خان نے کہا ہے کہ کراچی سندھ میں تبدیلی کا پیش خیمہ اور مرکز ہے،سیاسی اور حکومتی آلائشوں سے سندھ کو پاک کرنے کیلئے مربوط اور جامع حکمت عملی دیں گے،زرداری کے حواریوں اور الطاف کی باقیات سے نجات کا وقت آن پہنچا ہے۔ جمعرات کو پاکستان تحریک انصاف کے چیرمین عمران خان سے پارٹی کے سینئر رہنما عمران اسماعیل نے ملاقات کی جس میں انہوں نے کراچی کی سیاسی صورتحال پر تفصیلی بریفنگ دیتے ہوئے آئندہ انتخابات کے حوالے سے ممکنہ چیلنجز سے آگاہ کیا اور مردم شماری کے بعد کراچی کی سیاست میں تبدیلی کے امکانات پر بھی روشنی ڈالی ۔

(جاری ہے)

کراچی کی سیاست میں دیگر جماعتوں کے کردار اور ممکنہ اثرات پر گفتگو کرتے ہوئے چیئرمین تحریک انصاف نے کہا کراچی سندھ میں تبدیلی کا پیش خیمہ اور مرکز ہے، تحریک انصاف ملک کے دیگر حصوں کی طرح سندھ میں بھی مقبول ترین جماعت بن چکی ہے،سیاسی اور حکومتی آلائشوں سے سندھ کو پاک کرنے کیلئے مربوط اور جامع حکمت عملی دیں گے، عمران خان نے کہا آئندہ انتخابات میں سندھ اور کراچی میں عوامی مینڈیٹ پر نقب زنی کے منصوبے ناکام بنانا ہوں گی,زرداری کے حواریوں اور الطاف کی باقیات سے نجات کا وقت آن پہنچا ہے۔