ایوب ٹیچنگ ہسپتال ایبٹ آباد میں مدر اینڈ چائلد ہیلتھ سنٹر میں لیپرو سکوپک سرجری شروع کر دی گئی

ایمرجنسی سرجری کے علاوہ عام اور خاص آپریشن کیلئے مزید ایک آپریشن تھیٹر فعال

منگل 17 اپریل 2018 12:18

ایبٹ آباد۔ (اُردو پوائنٹ اخبارتازہ ترین - اے پی پی۔ 17 اپریل2018ء) ایوب ٹیچنگ ہسپتال مدر اینڈ چائلد ہیلتھ سنٹر میں لیپرو سکوپک سرجری شروع کر دی گئی۔ اس کے ساتھ ساتھ نئی شروع کی گئی 450 بیڈز ہسپتال میں ایمرجنسی سرجری کے علاوہ عام اور خاص آپریشن کیلئے ایک مزید آپریشن تھیٹر چلا دیا گیا ہے۔ لیپرو سکوپ کے ذریعہ پہلے صرف مرض کی تشخیص کی جاتی تھی، اب نئے آپریشن تھیٹر کے قیام سے لیپرو سکوپک آپریشن بھی شروع کر دیئے گئے ہیں جو علاقہ کے عوام کیلئے ایک بہت بڑی خوشخبری ہے۔

اس موقع پر پروفیسر ڈاکٹر روبینہ بشیر چیئرپرسن گائنی ڈیپارٹمنٹ نے بتایا کہ ان کی ڈاکٹرز کی ٹیم جو خصوصی تربیت رکھتی ہیں اور آغا خان یونیورسٹی ہاسپٹل سے تربیت حاصل کر چکی ہیں، اب یہ نئی سہولیات عوام کیلئے ان کی زیرنگرانی کھول دی گئی ہیں جس سے علاقہ کی عوام مستفید ہوں گی۔

(جاری ہے)

انہوں نے بتایا کہ ہماری کوشش ہے کہ محدود دستیاب وسائل کے اندر رہ کر عوام کی بہترین خدمت یقینی بنائی جا سکے، مزید سٹاف میسر آنے کے بعد بقایا آپریشن تھیٹرز بھی چلائے جائیں گے، آٹھ آپریشن تھیٹرز میں سے چار آپریشن تھیٹرز چلائے جا چکے ہیں۔

گذشتہ روز ڈاکٹر شہلا نور، ڈاکٹر رقیہ سلطانہ ایسوسی ایٹ پروفیسرز نے اپنی ٹیم کے ہمراہ پہلا لیپرو سکوپک کامیاب آپریشن کیا جبکہ دوسرے آپریشن تھیٹر میں ڈاکٹر بشریٰ خان جو کینسر کے علاج اور سرجری میں خصوصی تربیت رکھتی ہیں، نے مریض کا کینسر کا کامیاب آپریشن کیا۔ پروفیسر ڈاکٹر روبینہ بشیر نے اس موقع پر آپریشن تھیٹرز سٹاف اور اپنی پوری ٹیم کو مبارکباد پیش کی جن کی انتھک محنت اور کاوشوں سے آج یہ شعبہ اس قابل ہوا کہ عوام کی بھرپور خدمت کو یقینی بنائے۔ انہوں نے ہسپتال انتظامیہ کی کاوشوں کو بھی سراہا جنہوں نے محدود وسائل اور لامحدود مسائل کے ہوتے ہوئے عوام کا دیرینہ مسئلہ حل کیا اور عورتوں اور بچوں کے 450 بیڈز کے ہسپتال کو فعال بنایا۔