بین الاقوامی کمپنی ’’ کاسینی پارٹنرز ‘‘ پاکستان میںآپریشنز کا آغاز 2 مئی سے کرے گی

مینو فیکچرنگ ، ٹرانسپورٹ ، لاجسٹک اور بزنس سروسز کے شعبوں میں خدمات فراہم کریں گے، علائو منصور

بدھ 18 اپریل 2018 10:30

اسلام آباد ۔ (اُردو پوائنٹ اخبارتازہ ترین - اے پی پی۔ 18 اپریل2018ء) ملک کی اقتصادی ترقی کے فروغ ، روزگار کے مواقع پیدا کرنے ، افرادی قوت کی تربیت اور پاکستان کی صنعتی ترقی میں معاونت کیلئے بین الاقوامی کمپنی ’’ کاسینی پارٹنرز ‘‘ 2 مئی 2018ء سے باقاعدہ پاکستان میں اپنے آپریشنز کا آغاز کرے گی۔

(جاری ہے)

سرمایہ کاری بورڈ کے چیئرمین اور وزیر مملکت نعیم وائی زمیندار سے ملاقات کے دوران کمپنی کا سینی پارٹنرز کے منیجنگ پارٹنر علائو منصور نے کہا کہ ہم پاکستان میں مینو فیکچرنگ ، ٹرانسپورٹ ، لاجسٹک اور بزنس سروسز سیکٹرز میں اپنی خدمات فراہم کریں گے جس سے پاکستان میں روزگار کے نئے مواقع پیدا کرنے کے ساتھ ساتھ افرادی قوت کی تربیت اور صنعتی ترقی میں مدد ملے گی۔

اس موقع پر چیئرمین بی او آئی نے کہا کہ کمپنی پاکستان میں اپنے کاروبار کا آغاز کر رہی ہے جو باعث مسرت ہے ۔ انہوں نے کہا کہ پرائیویٹ ایکوئٹی پاکستانی اداروں کی ترقی میں کلیدی کردار ادا کرے گی جس سے ہمیں اقتصادی ترقی کے اہداف کے حصول میں مدد ملے گی۔