سپریم کورٹ نے قید کی سزا کیخلاف تین دہشت گردوں کی اپیلیں خارج کر دیں

ملزمان کا کالعدم تحریک طالبان سے تعلق ثابت ہوا، دہشتگردوں کے کیس میں تکنیکی خامیاں نہیں دیکھتے ،ْجسٹس آصف سعید کھوسہ

بدھ 18 اپریل 2018 13:32

اسلام آباد(اُردو پوائنٹ اخبارتازہ ترین - این این آئی۔ 18 اپریل2018ء) سپریم کورٹ نے قید کی سزا کیخلاف تین دہشت گردوں کی اپیلیں خارج کر دیں۔سپریم کورٹ میں تحریک طالبان پاکستان کے تین دہشت گردوں کی سزاؤں کے خلاف اپیلوں کی سماعت ہوئی۔ عدالت نے اپیلیں مسترد کرتے ہوئے تین کارندوں کی 14 سال قید سزا کا فیصلہ برقرار رکھا۔ ان میں سے ایک دہشتگرد حاجی حبیب کا جیل میں انتقال بھی ہوچکا ہے۔

جسٹس آصف سعید کھوسہ نے کہا کہ ملزمان کا کالعدم تحریک طالبان سے تعلق ثابت ہوا، دہشتگردوں کے کیس میں تکنیکی خامیاں نہیں دیکھتے، دہشتگرد 840 کلو دھماکہ خیز مواد کے ہمراہ رنگے ہاتھوں گرفتار ہوئے، ملزمان نے چھاپے کے وقت پولیس پر فائرنگ بھی کی۔ملزمان کے وکیل نے دلائل دیتے ہوئے کہا کہ ایک ملزم کم عمر ہے، اس سے کم سنی میں غلطی ہوئی۔

(جاری ہے)

جسٹس آصف کھوسہ نے کہا کہ دنیا میں پہلی غلطی کو آخری غلطی کہا جاتا ہے ،ْپاکستان میں کہا جاتا ہے پہلی بار ہے جانے دو، جانے دو کا کلچر دراصل دوسری غلطی کا لائسنس ہوتا ہے۔

وکیل نے کہا کہ ملزمان سے گن پاؤڈر ملا جو دھماکہ خیز مواد نہیں۔ جسٹس آصف کھوسہ نے کہا کہ تو آپ کیا چاہتے ہیں ملزمان سے ٹیلکم پاؤڈر ملتا ۔واضح رہے کہ ٹرائل کورٹ نے ملزمان کو چودہ سال قید کی سزا سنائی تھی اور ہائی کورٹ کے بعد اب سپریم کورٹ نے بھی سزا کو برقرار رکھا ہے۔