بھکر، مختلف محکموں کو بلیک میل کرنے والاجعلی ایس پی گرفتار، پولیس یونیفارم اور وائرلیس سیٹ برآمد

بھکر(اردوپوائنٹ اخبار تازہ ترین۔12جولائی 2025)بھکر میں مختلف محکموں کو بلیک میل کرنے والاجعلی ایس پی گرفتار، پولیس یونیفارم اور وائرلیس سیٹ برآمد، خود کو پولیس آفیسر ظاہر کر کے لوٹ مار اور دھوکا دہی کرنے والا ملزم ارباز آخر کار قانون کی گرفت میں آ گیا، بتایا گیا ہے کہ سرائے مہاجر تھانے کی پولیس نے کارروائی کرتے ہوئے جعلی ایس پی کو حراست میں لیا۔

ملزم کے قبضے سے پولیس یونیفارم، چھڑی، ٹوپی، اور وائرلیس سیٹ بھی برآمد کیا گیا۔پولیس حکام کے مطابق ملزم ارباز سادہ لوح افراد کو جھانسہ دے کر پیسے بٹورتا تھا اور خود کو ایس پی ظاہر کر کے اثرورسوخ جتاتا تھا۔ملزم کو چار روزہ جسمانی ریمانڈ پر پولیس کے حوالے کر دیا گیا جبکہ مزید تحقیقات جاری ہیں۔ وہ سوشل میڈیا پر بھی جعلی پولیس آفیسر کے طور پر سرگرم تھا۔

(جاری ہے)

ایس پی بھکر شوکت علی کے مطابق ارباز نہ صرف عام شہریوں بلکہ مختلف محکموں کو بھی بلیک میل کرتا رہا ہے۔ایس پی کا کہنا تھا کہ ملزم نے فیصل آباد میں اپنا جعلی دفتر قائم کر رکھا تھا جہاں پرائیویٹ گن مین، ہوٹر لگی گاڑی اور پولیس آفیسر کی طرز پر پروٹوکول استعمال کرتا تھا۔ملزم کیخلاف پنجاب کے مختلف اضلاع میں کم از کم 14 مقدمات درج ہیں جن میں جعلسازی، دھوکا دہی اور فراڈ شامل ہیں۔

گرفتار ہونے والے ملزم ارباز کاکہنا تھا کہ مجھ سے غلطی ہو گئی مجھے معاف کر دیا جائے۔پولیس حکام کا کہنا ہے کہ قانون سے کھیلنے والوں کو معافی نہیں دی جا سکتی۔خیال رہے کہ کراچی میں نے پولیس نے کارروائی کرتے ہوئے جعلی پولیس اہلکار کو گرفتار کرلیاتھا۔تھانہ ساحل پولیس نے جعلی پولیس اہلکاروں کے خلاف کامیاب کارروائی کرتے ہوئے 6 نوجوانوں کو گرفتار کیاتھا جو وردی پہن کر عوام کو دھوکہ دے رہے تھے۔

بتایا گیا تھا کہ پولیس کانسٹیبل عثمان معمول کے گشت پر تھے کہ مشکوک حالت میں تین موٹر سائیکلوں پر سوار چھ افراد کو پولیس یونیفارم میں ملبوس پایا گیا تھاملزمان تفتیش کے دوران پولیس سروس کارڈ دکھانے سے معذرت کی تھی اور اعتراف کیا تھا کہ وہ حقیقی پولیس اہلکار نہیں بلکہ شوقیہ وردی پہن کر عوام پر روب ڈالنے کی کوشش کر رہے تھے۔ گرفتا  ملزمان میں شہریار،محمد رضوان،یوسف خان،نور فراز،محمد کاشف،حماد شامل تھے جن سے تین موٹر سائیکلیں بھی برآمد کی گئیں تھیں۔

ملزمان کے خلاف مقدمہ زیر دفعات 170/171 تعزیرات پاکستان درج کیا گیا ہے، جن کا تعلق سرکاری حیثیت اختیار کرنے اور جعلی پولیس بننے سے تھے۔ پولیس نے مزید تفتیش کیلئے کیس ایس آئی او تھانہ ساحل کے سپرد کر دیا تھا۔