پریم یونین سی بی اے کے صدرحافظ سلمان بٹ کل کراچی پہنچیں گے،سٹی اسٹیشن پر فقید المثال استقبال کیا جائے گا

سٹی اسٹیشن پر پریم یونین کراچی کی تقریب حلف برداری ہوگی،حافظ سلمان بٹ ،محمود علی خان ،حافظ نعیم الرحمن اور دیگر خطاب کریں گے ، خیر محمد تونیو

بدھ 18 اپریل 2018 22:16

کراچی(اُردو پوائنٹ اخبارتازہ ترین - این این آئی۔ 18 اپریل2018ء) پریم یونین ریلوے سی بی اے یونین کی تقریب حلف برداری میں شرکت کے لئے پریم یونین سی بی اے کے مرکزی صدر حافظ سلمان بٹ کل بروز جمعرات صبح 10بجے کراچی اسٹیشن پہنچ رہے ہیں ۔ اس سلسلے میں پریم یونین کراچی ڈویژن کے صدر راجہ عبدالمناف اور جنرل سیکریٹری معین الدین و دیگر ذمہ داران نے حافظ سلمان بٹ کے فقید المثال استقبال کیلئے بھرپور طریقے سے تیاریاں کی ہیں ۔

پریم یونین ریلوے سی بی اے کے مرکزی جنرل سیکریٹری خیر محمد تونیو کی صدارت میں ایک اہم اجلاس منعقد ہوا جس میں حافظ سلمان بٹ کے استقبال اور تقریب حلف برداری کی تیاریوں کا جائزہ لیا گیا ۔ اس موقع پر خطاب کرتے ہوئے خیر محمد تونیو نے کہا کہ پریم یونین کی کامیابی اللہ کا ایک بہت بڑا انعام ہے ۔

(جاری ہے)

پریم یونین اپنے قائد حافظ سلمان بٹ کی قیادت میں ریلوے کے مزدوروں کی فلاح و بہبود کیلئے بھرپور طریقے سے جدوجہد کرے گی ۔

راجہ عبدالمناف نے کہا کہ آج بروز جمعرات صبح11بجے ڈی ایس آفس کے باہر تقریب حلف برداری منعقد ہوگی۔ حافظ سلمان بٹ کراچی ڈویژن کے ذمہ داران سے حلف لیں گے اس موقع پر نیشنل لیبر فیڈریشن پاکستان کے مرکزی صدر رانا محمود علی خان ،حافظ سلمان بٹ ، جماعت اسلامی کراچی کے امیر حافظ نعیم الرحمن ،این ایل ایف کراچی کے صدر عبدالسلام و دیگر ذمہ داران خطاب کریں گے۔

دریں اثناء نیشنل لیبر فیڈریشن کراچی ڈویژن کے صدر عبدالسلام ، جنرل سیکریٹری قاسم جمال، سینئر نائب صدر امان بادشاہ، نائب صدر محمد خالق، آرگنائزنگ شاہد ایوب خان و دیگر ذمہ داران نے کہا ہے کہ کراچی کے محنت کش حافظ سلمان بٹ کا فقید المثال استقبال کریں گے ۔ حافظ سلمان بٹ نے پاکستان میں مزدور تحریک کو زندہ کر دیا ہے ۔ پریم یونین کی کامیابی سے ریل کا مزدور خوشحال ہوگا اور ریل ترقی کی جانب گامزن ہوگی انہوں نے کہا کہ این ایل ایف اور اس کی ملحقہ یونینز کے کارکنان صبح10بجے سٹی اسٹیشن پر قائد پریم حافظ سلمان بٹ کا بھرپور طریقے سے استقبال کریں گے اور مزدوروں کے عظیم قائد کا کراچی پہنچنے پر یادگار استقبال کیا جائیگا ۔