بی آئی ایس پی ہیڈ کوارٹرز میں سینیگالی وفد کے تین روزہ مطالعاتی دورہ کے اختتامی سیشن کا انعقاد

جمعرات 19 اپریل 2018 18:24

اسلام آباد ۔ (اُردو پوائنٹ اخبارتازہ ترین - اے پی پی۔ 19 اپریل2018ء) بی آئی ایس پی ہیڈ کوارٹرز میں جمعرات کو سینیگالی وفد کے تین روزہ مطالعاتی دورہ کے اختتامی سیشن کا انعقاد کیا گیا۔ چیئرپرسن بی آئی ایس پی ماروی میمن اور سیکرٹری عمر حمید خان نے اختتامی سیشن کی میزبانی کی۔ 14رکنی سینیگالی وفد کی قیادت ڈائریکٹر نیشنل کیش ٹرانسفر پروگرام سینیگال گنینگو پاپے ملک نے کی۔

وزیراعظم کی معاون خصوصی نادیہ ایڈجاراتوو دیاکو، سیکرٹری مشیر دیالو عبدالله جبریل اور سینیگال میں مقیم عالمی بینک کے دیگر سوشل پروٹیکشن ماہرین بھی ان کے ہمراہ تھے۔ سینیگالی وفد نے تین روزہ مطالعاتی دورے کے دوران اپنے تجربات کا اظہار کرتے ہوئے بی آئی ایس پی قیادت کا شکریہ ادا کیا۔

(جاری ہے)

بی آئی ایس پی گریجویشن ماڈل، بائیومیٹرک تصدیق کے نظام، آئی ٹی اپلیکیشنز اور ڈیٹابیس مینجمنٹ سسٹم کوسراہتے ہوئے انہوں نے اس مطالعاتی دورے کو قابل قدر تجربہ قرار دیا۔

مزید برآں، سینیگالی وفد نے اس دورے کے دوران بی آئی ایس پی ٹیم کی جانب سے بہترین مہمان نوازی اور کھانے کا شکریہ ادا کیا۔ ماروی میمن نے جلد پاکستان کا دورہ کرنے کیلئے سینیگال کے وزیر کو دعوت دی۔ مزید برآں انہوں نے جدید NSER 3.0 ماڈل کا دستاویز بھی وفد کے ساتھ شیئر کیا تاکہ وہ اس ماڈل کی اہم خصوصیات کو اپنا سکیں۔ انہوں نے دونوں ممالک کو آئی ٹی پر مبنی اپلیکیشنز شیئر کرنے کے حوالے سے بھی دلچسپی ظاہر کی۔

سیکرٹری بی آئی ایس پی نے سینیگال میں دیگر پروگراموں کے ساتھ Strategic alignment of Senegalese Protection Model کے طریقہ کار کی تعریف کی۔ مزیدبرآں انہوں نے اس ماڈل کو برقرار رکھنے کیلئے دونوں ممالک میںغیر فعال نجی شعبے کے بارے میں بھی اپنے خیالات کا اظہا ر کیا۔ سیکرٹری بی آئی ایس پی نے اس مطالعاتی دورے کو دونوںممالک کیلئے جوائنٹ لرننگ پروسیس قرار دیا۔ انہوں نے مستقبل میں معلومات کے تبادلے کے عمل کو جاری رکھنے کی خواہش ظاہر کی۔