سابق وزیر دفاع خواجہ آصف نے اپنی نااہلی کے فیصلے کو سپریم کورٹ میں چیلنج کردیا

بدھ 2 مئی 2018 23:40

اسلام آباد ۔ (اُردو پوائنٹ اخبارتازہ ترین - اے پی پی۔ 02 مئی2018ء) سابق وزیر دفاع خواجہ آصف نے اپنی نااہلی کے فیصلے کو سپریم کورٹ میں چیلنج کرتے ہوئے استدعاکی ہے کہ اسلام آباد ہائیکورٹ کا فیصلہ اور الیکشن کمیشن کے نوٹیفکیشن کو کالعدم قراردیا جائے ۔

(جاری ہے)

بد ھ کو منیراے ملک کی وساطت سے دائر درخواست میں موقف اختیار کیاگیا ہے کہ اسلام آباد ہائیکورٹ کے فیصلے میں ملکی اور یو اے ای قوانین کو مدنظر نہیں رکھا گیا، ہائیکورٹ نے درخواست گزار کے رویے کو بھی سامنے رکھنا ہوتا ہے، جس نے عدالت سے حقائق چھپائے ہیں،خواجہ آصف نے مزیدکہا ہے کہ کاغذات نامزدگی میں 6.8ملین روپے کی بیرونی آمد ن کو ظاہر کیا، بیرون ملک کی ظاہر کردہ آمدن میں تنخواہ بھی شامل تھی، ہائیکورٹ نے قیاس آرائیوں کی بنیاد پر فیصلہ دیا ہے ،میرے خلاف رٹ پٹیشن 2017ء میں دائر ہوئی حالانکہ میں نے 2015 ء میں اپنا اقامہ ظاہر کیا تھا، جب میں نے ازخود اکائونٹ ظاہر کیا تھا ،خواجہ آصف کاکہنا ہے کہ کاغذات نامزدگی میں بیرون ملک کا بینک اکائونٹ غیر اداری طور پر ظاہر نہ کر سکا،بینک اکائونٹ میں کاغذات نامزدگی کے ڈیکلیئرڈ اثاثوں کی 0.5فیصد رقم تھی، استدعا ہے کہ اسلام آباد ہائیکورٹ کا فیصلہ اور الیکشن کمیشن کا نوٹیفکیشن کالعدم قراردیئے جائیں۔