پیپلزپارٹی قیادت کی جانب سے ٹکٹیں دینے کے اعلان کے بعد ملیر کی عوام سڑکوں پر نکل آئی ،ْامیدواروں کے حق میں نعرے بازی اورریلیاں

پیر 11 جون 2018 22:33

کراچی (اُردو پوائنٹ اخبارتازہ ترین - این این آئی۔ 11 جون2018ء) پیپلزپارٹی قیادت کی جانب سے ٹکٹیں دینے کے اعلان کے بعد ملیر کی عوام سڑکوں پر نکل آئی۔امیدواروں کے حق میں نعرے بازی اورریلیاں قدم بڑھائو بلاول ہم تمہارے ساتھ ہے کہ نعرے اور بھنگڑے بھی ڈالے گئے ۔

(جاری ہے)

تفصیلات کے مطابق پاکستان پیپلزپارٹی اعلیٰ قیادت کی جانب سے ٹکٹیں دینے کے اعلان کے بعد ضلع ملیر کے سردار جام عبدالکریم جوکھیو، حکیم بلوچ، آغا رفیع اللہ، ساجد جوکھیو،مرتضیٰ بلوچ، سلیم بلوچ، راجہ عبدالرزاق، محمود عالم جاموٹ کے حق میں ملیر کے کئی یوسیز کی عوام اور کارکنان گھروں سے روڈوں پر نکل آئے رقص کے ساتھ جیئے بھٹو اور قدم بڑھائو بلاول بھٹو ہم تمہارے ساتھ کے نعروں کی گونج جس کے بعد صبح ہوتے ہی چیئرمین یوسی چنڈ پاڑو ستار جوکھیو، چیئرمین یوسی گھگھر سلیم سالارجوکھیو، ممبر ضلع کونسل کراچی افضل جوکھیو، عبدالرزاق جوکھیو، نیاز احمد جوکھیو، بشیر گبول، واجد گبول، ربنواز جوکھیو، حق نواز جوکھیو، مختیارجوکھیو، شاہین جوکھیو، عزیزاللہ جوکھیو، عمران جوکھیو ، سلمان بلوچ کی سربراہی میں ریلی نکالی گئی ، ریلی میں شریک رہنمائوں نے ملیر عوامی پریس کلب ملیر کے صحافیوں سے گفتگو کرتے ہوئے کہا کہ پیپلزپارٹی قیادت کی جانب سے ملیر میں منتخب کئے جانے والے امیدواروں کی بھرپورحمایت کا اعلان کرتے ہیں ،کچھ کارکنان پارٹی کی خلاف ورزی کررہے ہیں وہ پارٹی سے کبھی بھی مخلص نہیں پارٹی نے جب بھی انہیں ذمہ داری سونپی ہے وہ اس پر پورا نہیں اترے ہیں ایسے لوگ ہمیشہ اپنے مفادات کے خاطر پارٹی کو نقصان پہنچاتے ہیں اور پارٹی قیادت کے خلاف مظاہرے اور کانفرنسیں کرنے والوں کے خلاف پارٹی کے قانون اور قوائد کے مطابق کاروائی کرکے پارٹی کونقصان سے بچایا جائے ، ریلی میں موٹرسائیکلیں اور کاروں میں سینکڑوں کی تعداد میں کارکنان موجود تھے ۔