ڈیر ہ اسماعیل خان ،ْ دہشت گردی کی واردات ، ایک پولیس اہلکارشہید، ایک شدید زخمی

ڈیر ہ اسماعیل خان (اُردو پوائنٹ اخبارتازہ ترین - این این آئی۔ 27 جون2018ء) تھانہ سٹی کی حدود میں تھلہ لعل شاہ کے قریب دہشت گردی کی واردات میں ایک پولیس اہلکارشہیدجب کہ دوسراشدید زخمی ہوگیا ‘واقعہ کی اطلاع پرڈی پی او ظہوربابر آفریدی اورڈی ایس پی سٹی افتخار شاہ سمیت دیگر پولیس افسران موقع پر پہنچ گئے ‘پولیس نے علاقے میں سرچ آپریشن کے دوران متعددگرفتارکرلیے‘سی ٹی ڈی پولیس نے واقعہ کا مقدمہ دہشت گردی ایکٹ سمیت دیگردفعات کے تحت درج کرلیا۔

تفصیلات کے مطابق تھانہ سٹی کی حدود میں تھلہ لعل شاہ کے قریب ایگل سکواڈپردوران گشت دوپولیس اہلکاروں پر رات کے وقت نامعلوم دہشت گردوں نے فائرنگ کردی جس سے پولیس حوالدارظفرعلی سکنہ کچی پائند خان موقع پرشہید ہوگیا جب کہ پولیس کانسٹیبل ذوالفقار شاہ سکنہ ظفرآباد شدید زخمی ہوگیا ۔

(جاری ہے)

واقعہ کے بعد ڈی پی او ظہوربابرآفریدی ، ڈی ایس پی سٹی افتخارشاہ پولیس کی بھاری نفری سمیت موقع پر پہنچ گئے اوراس واقعہ کی تفتیش شروع کردی ۔

بعدازاں پولیس نے مختلف علاقوں میں سرچ کیااورتقریباًایک درجن سے زائد مشکوک افراد کوگرفتارکرلیاجن کو تفتیش کے لیے نامعلوم مقام پر منتقل کردیاگیاہے ۔ شہید ہونے والے حوالدارظفرعلی کی نمازجنازہ کوٹلی امام حسین میں اداکی گئی جب کہ دوسری جانب سی ٹی ڈی پولیس نے اس واقعہ کا مقدمہ دہشت گردی ایکٹ سمیت دیگردفعات کے تحت نامعلوم دہشت گردوںکے خلاف درج کرلیاہے۔