الیکشن کمیشن نے انتخابی پوسٹرز میں چیف جسٹس اور آرمی چیف کی تصاویر شائع کرنے پر پی ٹی آئی امیدوار سے جواب طلب کرلیا

پیر 2 جولائی 2018 15:10

اسلام آباد(اُردو پوائنٹ اخبارتازہ ترین - این این آئی۔ 02 جولائی2018ء) الیکشن کمیشن نے انتخابی پوسٹرز میں چیف جسٹس اور آرمی چیف کی تصاویر شائع کرنے پر پی ٹی آئی امیدوار سے جواب طلب کرلیا۔الیکشن کمیشن آف پاکستان نے چنیوٹ میں اشتہارات اور پوسٹرز پر چیف جسٹس میاں ثاقب نثار اور آرمی چیف جنرل قمر جاوید باجوہ کی تصاویر لگانے سے متعلق کیس کی سماعت کی۔

قومی اسمبلی کے حلقہ این اے 80 گوجرانوالہ تحریک انصاف کے امیدوار صوبائی اسمبلی ناصر چیمہ الیکشن کمیشن میں پیش ہوئے۔

(جاری ہے)

چیف الیکشن کمشنر نے ناصر چیمہ سے پوچھا کہ کس بنیاد پر آپ نے چیف جسٹس اور آرمی چیف کی تصاویر لگائیں آرمی چیف اور چیف جسٹس کا انتخابات سے کیا تعلق کیا وہ آپ کے رشتہ دار ہیں ۔ امیدوار تحریک انصاف ناصر چیمہ نے کہا کہ یہ اشتہار اور پوسٹرز الیکشن شیڈول جاری ہونے سے پہلے لگائے تھے۔

چیف الیکشن کمشنر سردار محمد رضا نے کہا کہ اشتہار جب بھی لگائے گئے، آپ یہ بتائیں کہ کیوں لگائے گئی ۔ الیکشن کمیشن نے امیدوار تحریک انصاف ناصر چیمہ سے تحریری جواب طلب کرتے ہوئے کہا کہ کیوں نہ آپ کو عام انتخابات میں نااہل کر دیا جائے۔ الیکشن کمیشن نے کیس کی سماعت نو جولائی تک ملتوی کردی۔