وزیراعظم عمران خان سے مولانا سمیع الحق کی ملاقات ، اہم مسائل پر یقین دہانی

اسلام آباد(اُردو پوائنٹ اخبارتازہ ترین - این این آئی۔ 12 اکتوبر2018ء) وزیراعظم پاکستان عمران خان نے کہاہے کہ ہمارے ہوتے ہوئے کوئی قادیانیوں کو غیر مسلم قرار دینے والے آئینی ترمیم اور ناموس رسالت ایکٹ میں ردوبدل کے بارے میں سوچ بھی نہیں سکتا ،یہ دونوں باتیں وزیراعظم پاکستان نے جمعیة علماء اسلام کے امیر مولانا سمیع الحق سے خصوصی ملاقات میں کہیں، دو گھنٹے کی اس ملاقات میں اہم دینی اورملکی مسائل زیربحث آئے، اورمولانا سمیع الحق نے انہیں اپنی جماعت جمعیت علماء اسلام اوردفاع پاکستان کونسل میں شامل جماعتوں کے موقف سے آگاہ کیا،سینٹ میں توہین رسالت ایکٹ کے بارہ میں مسئلہ اٹھانے کو عمران خان نے کسی کی شرارت قرار دیا اور کہاکہ کابینہ میں یہ مسئلہ اور نہ کسی بھی فورم میں زیربحث آیا ہے، اور میں نے اسے واپس لینے کا فوری حکم جاری کردیا ہے ۔

(جاری ہے)

مولانا سمیع الحق نے انہیں قادیانیوں کے ملک دشمنی پر مبنی سامراجی سازشوں اور مغربی قوتوں کی مذکورہ دونوں آئینی ترامیم کو ختم کرنے میں درپردہ مسلسل کوششوں سے آگاہ کیا اوران دونوں ترامیم کے بارہ میں قومی اسمبلی میں پیش کی گئی تفصیلات انہیں پیش کیں ،مولاناسمیع الحق نے ملک میں بڑھتی ہوئی مہنگائی سے پیداشدہ عوامی تشویش سے آگاہ کیا جس سے عمران خان نے اتفاق کرتے ہوئے چاروں صوبوں کے وزراء کو مہنگائی بالخصوص ٹرانسپورٹ پر کڑی نگاہ رکھنے اور کنٹرول کرنے کے احکامات جاری کئے،وزیراعظم نے ملک کے اقتصادی مشکلات سے مولانا سمیع الحق کو تفصیل سے آگاہ کیا اور کہاکہ حکمران کرپشن کی وجہ سے خزانہ لوٹ چکے ہیں، ایک ماہ کے لئے بھی ملک چلانا مشکل ہے، چند ماہ قوم اور حکومت کو مشکلات کا سامنا کرنا پڑے گا ،میری کوشش ہے کہ چندماہ میں یہ صورتحال سدھر جائے ۔

مولانا سمیع الحق نے پاکستان میںمقیم افغان مہاجرین اور بنگالیوں کو نیشنلٹی دینے کے اعلان کو جلد عملی جامہ پہنانے کا مشورہ دیا، اوراس کے سیاسی اقتصادی اور دفاعی فوائد سے آگاہ کیا اور پاک افغان بارڈر پر مہاجرین کی آمدورفت سے ہر ماہ ویزے کی تجدید اوردیگر مشکلات سے آگاہ کیا جس پر انہوں نے سپیکر قومی اسمبلی اسد قیصر کو کمیٹی بنا کر اسے حل کرنے کا حکم دیا۔

دینی مدارس کے بارے میں پھیلائی گئی خبروں کے بارے میں وزیراعظم نے مولانا کو یقین دلایا کہ ہم دینی مدارس کے مسائل سے آگا ہ ہیں اور ایسے کسی اقدام کا سوچ بھی نہیں سکتے جس سے مدارس پر کوئی قدغن لگ سکتی ہو، مولانا سمیع الحق نے مدارس کی تنظیمات کے ساتھ ملاقات میں پیش کردہ تجاویز پر جلدی عملدرآمد ہونے کا مشورہ دیا اور کہا کہ اس بارے میں ہمیشہ مدارس کے وفاقوں سے رہنمائی حاصل کرنے کی تجویز دی۔

وزیراعظم نے کہاکہ میں روز اول سے مدارس کی اہمیت سمجھتے ہوئے اسے قدر کی نگاہ سے دیکھتا ہوں اور انہیں دین کے اہم مراکز سمجھتا ہوں، اورانہیں یونیورسٹیوں اور کالجز کے برابر مقام دینا چاہتاہوں، افغانستان میں قیام امن کی ضرورت اوراہمیت کے بارہ میں انہوں نے مولاناسمیع الحق کی کوششوں کو سراہتے ہوئے جدوجہد کو مزید تیز کرنے کی خواہش ظاہر کی ملاقات میں اسپیکر قومی اسمبلی جناب اس قیصر اور سیاسی امورکے مشیر جناب نعیم الحق بھی موجود تھے۔