حوثی باغی سعودی عرب اور امارات پر حملے بند کریں، امریکا

عرب اتحاد بھی یمن میں باغیوں کے خلاف فضائی حملوں میں شہریوں کا تحفظ یقینی بنائے،امریکی محکمہ خارجہ کا بیان

جمعرات 1 نومبر 2018 11:20

واشنگٹن(اُردو پوائنٹ اخبارتازہ ترین - این این آئی۔ 01 نومبر2018ء) امریکی وزارت خارجہ نے یمن میں ایران نواز حوثی باغیوں سے مطالبہ کیا ہے کہ وہ سعودی عرب اور متحدہ عرب امارات پر حملے بند کریں۔غیرملکی خبررساں ادارے کے مطابق امریکی وزارت خارجہ کی طرف سے جاری ایک بیان میں کہا گیا کہ حوثی باغیوں کی طرف سے سعودی عرب اور متحدہ عرب امارات پر میزائل حملے اور ڈرون طیاروں کی مدد سے کارروائیاں ناقابل قبول ہیں۔

(جاری ہے)

وزارت خارجہ سعودی عرب کی قیادت میں قائم عرب فوجی اتحاد پر بھی زور دیا کہ وہ یمن میں باغیوں کے خلاف فضائی حملوں میں شہریوں کا تحفظ یقینی بنائیں۔بیان میں مزید کہا گیا کہ یمن جنگ کے خاتمے کے لیے ماحول کو سازگار بنانا ضروری ہے۔ اس لیے فریقین ایک دوسرے کے خلاف طاقت کے استعمال سے گریز کریں اور امن بات چیت کو آگے بڑھانے کی عالمی مساعی میں ساتھ دیں۔ادھر اقوام متحدہ کے ایک باخبر ذریعے کے مطابق رواں ماہ کے آخر تک سویڈن کی میزبانی میں یمن کے حوالے سے امن مذاکرات متوقع ہیں۔ سوئٹرزلینڈ اور آسٹریا نے بھی یمن جنگ کے خاتمے کے لیے مذاکرات کی میزبانی کی پیش کش کی ہے۔