مستقبل کے چیلنجز سے نمٹنے اور جدید تقاضوں سے ہم آہنگی کیلئے نوجوانوں کے خصوصی تربیتی پروگرامز میں داخلوں کا سلسلہ شروع

جمعہ 19 اپریل 2019 14:21

فیصل آباد (اُردو پوائنٹ اخبارتازہ ترین - اے پی پی۔ 19 اپریل2019ء) مستقبل کے چیلنجز سے نمٹنے اور جدید تقاضوں سے ہم آہنگی کیلئے نوجوانوں کے خصوصی تربیتی پروگرامز میں داخلوں کا سلسلہ شروع کر دیا گیاہے جبکہ انڈسٹریل سیکٹر کی مشاورت سے شروع کئے جانے والے مذکورہ پروگرامز سے ہنر مند افرادی قوت کو روز گار کے لاکھوںنئے مواقع دستیاب ہو سکیں گے۔

نیوٹیک کے ذرائع نے بتایا کہ فیصل آباد میں 8تعلیمی اداروں گورنمنٹ کالج آف ٹیکنالوجی فار بوائز فیصل آباد، گورنمنٹ کالج آف ٹیکنالوجی برائے خواتین پیپلز کالونی، گورنمنٹ سٹاف ٹریننگ کالج پیپلز کالونی ،صنعت زار ڈی گرائونڈ ، محمد علی جناح پولی ٹیک انسٹیٹیوٹ پیپلز کالونی،انسٹیٹیوٹ آف ٹورازم آفیسرز کالونی،لاہور کالج آف ایجوکیشن فیصل آباد ، لیبارٹری کالج آف ٹیکنالوجی جھنگ روڈ اور گورنمنٹ ٹیکنیکل ٹریننگ انسٹیٹیوٹ جناح کالونی فیصل آباد میں مذکورہ خصوصی تربیتی پروگرامز شروع کئے جا رہے ہیں جس کیلئے درخواستوں کی وصولی شروع کر دی گئی ہے۔

(جاری ہے)

انہوںنے بتایاکہ اگلے ماہ کے وسط سے شروع ہونے والی کلاسز کے دوران 50مختلف شعبہ جات میں 6ماہ کے دورانیہ کیلئے تمام طلباء کو نہ صرف مفت داخلہ اور تعلیم بلکہ 3ہزار روپے ماہانہ وظیفہ اور ٹول کٹس بھی فراہم کی جائیں گی۔