اصغر خان کیس،ایف آئی اے نے ایک مرتبہ پھر کیس بند کرنے کی استدعا کر دی

کیس کو آگے بڑھانے کیلئے خاطر خواہ ثبوت نہیں مل سکے، ناکافی ثبوت کی بنیاد پر کیس کو کسی بھی عدالت میں چلانا ممکن نہیں ،ایف آئی اے

پیر 22 اپریل 2019 13:29

اصغر خان کیس،ایف آئی اے نے ایک مرتبہ پھر کیس بند کرنے کی استدعا کر ..

اسلام آبا(اُردو پوائنٹ اخبارتازہ ترین - این این آئی۔ 22 اپریل2019ء) ایف آئی اے نے سپریم کورٹ سے ایک مرتبہ پھر اصغر خان کیس کو بند کرنے کی استدعا کر دی ۔پیر کو فیڈرل انویسٹی گیشن ایجنسی (ایف آئی اے )نے سپریم کورٹ آف پاکستان سے ایک مرتبہ پھر اصغر خان کیس کو بند کر نے کی استدعا کرتے ہوئے کہا کہ ناکافی ثبوت کی بنیاد پر کیس کو کسی بھی عدالت میں چلانا ممکن نہیں رہا۔

(جاری ہے)

ایف آئی اے نے کہا کہ بے نامی بینک اکاؤنٹس کی تحقیقات سمیت تمام اہم گواہوں کے بیانات ریکارڈ کیے گئے اور ایف آئی اے کی انکوائری کمیٹی نے نجی ٹی وی کے 2 صحافیوں، مجیب الرحمن شامی اور حبیب اکرام سے بھی انٹرویوز کیے ،مرکزی گواہ برگیڈیئر (ر) حامد سعید اور ایڈووکیٹ یوسف میمن سے پوچھ گچھ بھی کی گئی۔تحقیقاتی ادارے نے اپنے جواب میں کہا کہ کیس کو آگے بڑھانے اور مزید ٹرائل کے لیے خاطر خواہ ثبوت نہیں مل سکے۔وفاقی تحقیقاتی ادارے نے سپریم کورٹ سے استدعا کی کہ ناکافی ثبوت کی بنیاد پر کیس کو کسی بھی عدالت میں چلانا ممکن نہیں ۔