صوبے کی30اضلاع میں ایک لاکھ 20ہزار 7سو ایکڑ زمین کسانوں کو الاٹ کرنے کا فیصلہ

لاہور۔20 جولائی(اُردو پوائنٹ اخبارتازہ ترین - اے پی پی۔ 20 جولائی2019ء) صوبائی وزیر اطلاعات و ثقافت میاں اسلم اقبال نے کہا ہے کہ پنجاب کابینہ نے لینڈلیز پالیسی کے تحت صوبے کی30اضلاع میں ایک لاکھ 20ہزار 7سو ایکڑ زمین کسانوں کو الاٹ کرنے کا بڑا فیصلہ کیا ہے۔یہ غیر آباد زمینیں کسانوں کو کاشتکاری کیلئے عرصہ دراز سے دی گئی تھیں اور کسانوں نے اپنی محنت سے ان زمینوں کو آباد کیا اور اب یہ زمینیں انہیں الاٹ کردی جائیں گی۔

اس کا میکانزم بنالیا گیا ہے،زمین کی ویلیوہرضلعی کلکٹر نے طے کردی ہے ۔ کسانوں کو ساڑھے بارہ ایکڑ تک رقبہ الاٹ کیا جائے گا۔سٹیٹ لینڈ کی ڈسپوزل پالیسی کے بھی جامع اصولوں کی منظوری دی گئی ہے اب پسند اور ناپسند کی بنیاد پر زمین کی الاٹمنٹ کا سلسلہ ختم کردیاگیا ہے۔

(جاری ہے)

کسی وزیر یا افسر کے صوابدیدی اختیارات ختم کردیئے گئے ہیں اس حوالے سے شفاف میکانزم وضع کیا گیا ہے جس سے مقدمہ بازی کا بھی خاتمہ ہوگا-زمین لیز پر دینے کے حوالے سے پہلے محکمہ ریونیو جو عام آدمی کو تنگ کرتا تھا اب اس پالیسی کے تحت اس کی جان محکمہ ریونیو سے چھڑا دی گئی ہے عارضی کاشت لیز کے حوالے سے بھی پالیسی وضع کردی گئی ہے اور یہ پالیسی2016سے رکی ہوئی تھی اب اسے 2020تک توسیع دی گئی ہے -صوبائی کابینہ نے فیصلہ کیا ہے کہ آئندہ لیز کی مدت ایک سال کی بجائے تین سال ہوگی- لیز ہولڈرواجبات ادا کرکے لیز کو توسیع دلا سکتے ہیں - صوبائی وزیر نے پریس کانفرنس سے خطاب کرتے ہوئے کیا۔

صوبائی وزیر نے کہا کہ حالیہ بارشوں، طوفان اور ڑالہ باری کے باعث ہونے والے نقصان کے ازالے کیلئے بھی صوبائی کابینہ نے مکمل پیکیج کی منظوری دی ہے۔26اضلاع کے 55متاثرہ دیہاتوں کو آفت زدہ قرار دیا گیا ہے اور یہاں آبیانہ، مالیہ معاف ہوگا -صوبائی وزیر نے کہا کہ پولیس کے منجمند فکس ڈیلی الاؤنس کو 2013کی شرح سے بحال کرنے کی بھی منظوری دی گئی ہے -دہشت گردی کے خلاف جنگ میں پولیس کی قربانیوں کے پیش نظر پنجاب حکومت نے اپنے محدود وسائل کے اندر رہتے ہوئے پولیس کے الاؤنس بڑھانے کا فیصلہ کیا ہے۔

پولیس فورس کے گریڈ ایک سے گیارہ کے ملازمین جن کی تعداد ایک لاکھ85 ہزار 248بنتی ہے ان کے الاؤنس بڑھانے پر ہر سال تقریبا دس ارب روپے اضافی خرچ ہوگا۔ بارہ سے گریڈ سولہ کے 22464ملازمین کے الاؤنسز بڑھانے پر تقریبا2.08ارب روپے خرچ ہوں گے۔گریڈ 17 سے 22 تک کے ایک ہزار سے زائد پولیس ملازمین کے الاؤنسز بڑھانے پر 0.26بلین خرچ ہوں گی- سیکرٹریٹ کے ملازمین کیلئے بھی الاؤنسز بڑھانے کی منظوری دی گئی ہے۔