نئے پاکستان میں خواجہ سراؤں کو بھی معاشرے میں اپنایا جانے لگا

بیت المال پاکستان میں خواجہ سرا کو نائب قاصد کی ملازمت دے دی گئی

سمیرا فقیرحسین جمعہ 26 جولائی 2019 14:34

نئے پاکستان میں خواجہ سراؤں کو بھی معاشرے میں اپنایا جانے لگا

اسلام آباد (اُردو پوائنٹ تازہ ترین اخبار۔ 26 جولائی 2019ء) : خواجہ سرا کو اہم ادارے میں ملازمت دے دی گئی۔ تفصیلات کے مطابق بیت المال پاکستان میں خواجہ سرا کو نائب قاصد کی ملازمت دے دی گئی۔ اس حوالے سے مائیکروبلاگنگ ویب سائٹ ٹویٹر پر پریس انفارمیشن ڈیپارٹمنٹ نے بھی پیغام جاری کیا جس میں بتایا گیا کہ بیت المال میں خواجہ سرا فیصل کو ملازمت دے دی گئی ہے،اور اس کی تعلیمی قابلیت میٹرک ہے۔

پریس انفارمیشن ڈیپارٹمنٹ نے اپنے ٹویٹ میں خواجہ سرا فیصل کی تصویر بھی شئیر کی۔ جس کے بعد محکمہ اطلاعات نے فیصل کی ملازمت کا خیرمقدم بھی کیا۔ خیال رہے کہ خواجہ سراؤں کو آہستہ آہستہ معاشرے میں ان کا مقام مل رہا ہے۔ عام انتخابات 2018ء میں بھی پاکستان کی تاریخ میں پہلی مرتبہ ایک خواجہ سرا نے قومی اسمبلی کا الیکشن لڑنے کا اعلان کیا۔

(جاری ہے)

نایاب علی نامی خواجہ سرا نے عام انتخابات 2018ء میں پنجاب کے حلقہ این اے 141 اوکاڑہ سے آزاد اُمیدوار کی حیثیت سے الیکشن میں حصہ لینے کا اعلان کیا تھا۔

اس کے علاوہ عام انتخابات 2018ء میں خواجہ سراؤں نے اپنا حق رائے دہی استعمال کیا جو اس بات کا واضح ثبوت ہے کہ خواجہ سراؤں کو بھی معاشرے میں ایک مقام دے دیا گیا ہے۔جبکہ معاشرے نے بھی ان وجود کو تسلیم کرتے ہوئے مختلف شعبوں میں خواجہ سراؤں کی خدمات حاصل کرنا شروع کر دی ہیں۔ اس کے علاوہ اپریل 2018ء میں لاہور میں خواجہ سراؤں کا ایک تعلیمی ادارہ بھی کھولا گیا۔ اس اسکول کا نام '' دی جینڈر گارڈین'' رکھا گیا جس میں خواجہ سراؤں کو پیشہ ورانہ اور تعلیمی ٹریننگ دی جاتی ہے۔خواجہ سرا مارویہ ملک کی سب سے پہلی نیوز اینکر کے طور پر اُبھریں۔ جبکہ اگست 2018ء میں پاکستان کی تاریخ میں پہلی مرتبہ ایک خواجہ سرا کا بینک اکاؤنٹ کھولا گیا تھا۔