انسداد پولیو مہم کے خلاف سازشی عناصر کا منفی پروپیگنڈہ بری طرح ناکام ہوچکا ہے، ڈی سی کوہاٹ

منگل 6 اگست 2019 16:41

کوہاٹ (اُردو پوائنٹ اخبارتازہ ترین - اے پی پی۔ 06 اگست2019ء) ڈپٹی کمشنر کوہاٹ مطیع اللہ خان نے کہا ہے کہ انسداد پولیو مہم کے خلاف سازشی عناصر کا منفی پروپیگنڈہ بری طرح ناکام ہو گیا ہے، عوام اس کی حقیقت جان چکے ہیں اور یہ کبھی بھی ان عناصر کے جھانسے میںنہیںآئیں گے۔انہوں نے نئی نسل کو تاحیات معذوری سے بچانے کیلئے تمام مکتبہ فکرکے لوگوں کوانسداد پولیو کے خلاف جہاد میں بڑھ چڑھ کر حصہ لینے کی اپیل کی ہے ۔

وہ اپنے دفترمیں ضلعی انسداد پولیو کمیٹی کے اجلاس کی صدارت کر رہے تھے جس میں ایڈیشنل ڈپٹی کمشنر شاہ نواز ،اسسٹنٹ کمشنر کوہاٹ فرقان اشرف ،اسسٹنٹ کمشنر لاچی محمد علی شاہ اورمتعلقہ سرکاری محکموں کے حکام نے شرکت کی ۔ اجلاس میں 24 اگست سے شروع ہونے والی انسداد پولیو مہم کے اہداف اور لائحہ عمل کے بارے میں تفصیلی بریفنگ دی گئی۔

(جاری ہے)

ڈپٹی کمشنر نے کہا کہ انسداد پولیو مہم کے باوجود ملک میں پولیو کیسز کا سامنے آنا لمحہ فکریہ ہے جن کی سب سے بڑی وجہ والدین کا انکار ہے جو اپنے بچوں کوانسداد پولیو کے قطرے نہیں پلاتے ۔

انہوں نے کہا کہ پولیو ویکسینشن کی اہمیت سے انکار نہیں کیا جاسکتا لیکن بعض عناصر اپنے مذموم عزائم کی تکمیل کیلئے منفی پروپیگنڈہ کر رہے ہیں لیکن وہ ہمارے باشعور عوام کو گمراہ نہیں کرسکتے ۔ڈپٹی کمشنر نے کہا کہ پولیو کی بیخ کنی کیلئے تمام مکاتب فکر کے علماء کرام ،عمائدین علاقہ اورعوام کی ایک پلیٹ فارم پرمتحد ہونا وقت کا تقاضا ہے کیونکہ یہ ہم سب کا قومی فریضہ ہے ۔