عوام ڈینگی مچھروں کی افزائش کی روک تھام کیلئے ماحول کو صاف ستھرا رکھیں، طبی ماہرین

فیصل آباد (اُردو پوائنٹ اخبارتازہ ترین - اے پی پی۔ 26 ستمبر2019ء) طبی ماہرین نے عوام سے کہاہے کہ وہ موجودہ بدلتے ہوئے موسم میں ڈینگی مچھروں کی افزائش کی روک تھام کیلئے اپنے گھروں،محلوں اورگلیوں میں موجود غیر ضروری پانی کوخشک اورماحول کو صاف ستھرا رکھیں کیونکہ ڈینگی مچھر گھروں کی چھتوں اورصحن میں موجود کوڑا کرکٹ و غیر ضروری سامان میں بارش یا ٹینکی کا پانی جمع ہونے سے پھیلتا ہے ۔

انہوں نے شہریوں پر زور دیا کہ وہ حکومت پنجاب کی ڈینگی مچھر مکائو مہم کو کامیاب بنانے کیلئے اپنے گھروں کی چھتوں پرموجودناقص اور غیر ضروری سامان میں بارشوں کا پانی کھڑا نہ ہونے دیں ،دروازوں ،کھڑکیوں اور روشن دانوں میں جالیاں استعمال کریں۔انہوں نے عوام سے استدعا کی کہ وہ ڈینگی مکائو مہم میں شامل ہو کر قومی فریضہ ادا کریں کیونکہ ڈینگی سے ڈرنا نہیں بلکہ اس سے لڑنا اور اس کو اجتماعی کاوشوں سے شکست دینا ہے ۔

(جاری ہے)

انہوں نے کہا کہ ڈینگی مچھرکے خاتمہ کیلئے بحیثیت قوم صفائی کی عادت اپنانا ہوگی ۔انہوں نے بتایاکہ زرعی سائنسدانوں نے ڈینگی کے خاتمہ کیلئے غیر کیمیائی طریقے وضع کرنے کے ساتھ ساتھ ایسی زہروں کی نشاندہی کی ہے جن کے استعمال سے ڈینگی مچھروں کا تدارک آسان ہوگیا ہے اور یہ زہریں انسانوں کیلئے ضرررساں بھی نہیں ہیں ۔انہوںنے بتایاکہ شہری گھروں کی چھتوں ، صحنوں اورگلی محلوں میں ڈینگی مچھر کی تلفی کیلئے ڈیلٹا میتھرین اور لیمڈا سائی ہیلوتھرین زہروں کا سپرے کریںنیزجوہڑوں وغیرہ میں کھڑے پانی میں لاروئوں کی تلفی کیلئے ٹیمی فاس اور فین تھیان زہروں کا استعمال بھی کیاجاسکتاہے۔