یہ ائیرلائن اب ونیلا کے ذائقے کا خوردنی کافی کپ پیش کرے گی

امین اکبر جمعہ 27 دسمبر 2019 23:55

کافی پینے کے بعد کافی کے کپ کو بھی چبا چبا کر کھا نا کچھ مزیدار خیال نہیں لیکن نیوزی لینڈ کی ایک ائیر لائن اپنے مسافروں کی تواضع کافی کے ساتھ ساتھ کافی کے کپ سے بھی کرے گی۔
اس ائیر لائن نے آن بورڈ کوڑا کرکٹ کم سے کم کرنے کے لیے اپنے مسافروں کو خوردنی کپ میں کافی دینا شروع کر دی ہے۔
یہ پہلی بار نہیں کہ نیوزی کی قومی ائیر لائن نے کوڑا کرکٹ ٹھکانے لگانے کے لیےماحول دوست تجربات کیے ہوں۔

ماضی میں یہ ائیر لائن اپنی پروازوں اور لاؤنج میں بائیو ڈی گریڈ ایبل کپ پیش کر چکی ہے۔ اب ایک قدم آگے بڑھتے ہوئے ائیرلائن نے خوردنی کپ بنانے میں ماہر خاندانی کاروباری کمپنی ٹوائس کے ساتھ اشتراک کیا ہے۔
یہ نئے کپ خاص طور پر ائیر لائن کے لیے بنائے جائیں گے۔ یہ کپ ونیلا فلیور میں ہونگے اور گرم چیز جیسے کافی سے نہیں پگھلیں گے۔

(جاری ہے)

ائیر لائن کی کسٹمر ایکسپیئرنس منیجر نکی شیو نے سی این این ٹریول کو بتایا کہ اُ ن کی ائیر لائن میں مسافروں کو ہر سال 8 ملین کپ کافی پیش کی جاتی ہے۔تجرباتی مراحل میں ائیر لائن کے مسافروں کا ردعمل بھی بہت مثبت رہا ہے، جس کے بعد ٹوائس اور ائیر نیوزی لینڈ اپنے اشتراک کو مزید بڑھا رہے ہیں۔
اس سال جولائی میں ائیر نیوزی لینڈ نے ایک دفعہ استعمال ہونے والے پلاسٹک کنٹینر کا استعمال ترک کر کے چھوٹے اور دوبارہ استعمال ہونے والے برتن استعمال کرنا شروع کیے ہیں۔