خاتون کا شوہر کی دوسری بیوی کو جگر کا عطیہ، سب حیران

شہری ماجد کی پہلی اہلیہ کئی سال سے شدید علیل تھیں ان کے گردے ناکارہ ہوچکے تھے

ساجد علی منگل 12 اگست 2025 08:34

خاتون کا شوہر کی دوسری بیوی کو جگر کا عطیہ، سب حیران

طائف ( اُردو پوائنٹ اخبارتازہ ترین۔ 12 اگست 2025ء ) سعودی عرب میں ایک خاتون نے شوہر کی دوسری بیوی کو جگر عطیہ کرکے سب کو حیران کردیا۔ سعودی گزٹ کے مطابق سعودی عرب میں ایک خاتون نے اپنے شوہر کی شدید بیماری دوسری بیوی کو اپنا 80 فیصد جگر عطیہ کرکے قربانی اور محبت کی نئی مثال قائم کردی، طائف کے شہری ماجد بلدہ الروقی کی ایک اہلیہ تغرید عوض السعدی کئی سال سے شدید علیل تھیں، ان کے گردے ناکارہ ہوچکے تھے، سعودی شہری کی اہلیہ کئی سال سے ڈائلاسز پر تھی اور شوہر نے ان کے علاج کے لیے امریکہ سے لے کر برطانیہ تک سفر کیا لیکن وہ صحتیاب نہ ہوسکی، مسلسل ڈائلاسز پر رہنے اور جگر کے شدید متاثر ہونے کے بعد سعودی شہری نے اپنی بیمار اہلیہ کو ایک گردہ عطیہ کرنے کا فیصلہ کیا اور انہوں نے اپنے ٹیسٹ مکمل کرواکر ڈاکٹرز سے رضامندی بھی ظاہر کردی۔

(جاری ہے)

بتایا گیا ہے کہ شوہر نے اپنا گردہ عطیہ کرنے سے قبل اپنے تمام پانچ بچوں اور دوسری اہلیہ نورا سالم الشمری کو بھی آگاہ کیا اور انہیں آپریشن کے وقت ہسپتال میں موجود رہنے کی ہدایت کی، سعودی شہری نے اپنی بیوی اور پانچوں بچوں کو آگاہ کیا تھا کہ گردہ عطیہ کرنے کے دوران کسی طرح کی بھی پیچیدگی ہو سکتی ہے اس کے لیے پورا خاندان تیار رہے، سعودی شہری کی جانب سے دوسری بیوی اور بچوں کے ہمراہ ہسپتال پہنچنے کے بعد ان کی صحت مند بیوی نے اپنی سوکن کو جگر عطیہ کرنے کی رضامندی ظاہر کرکے شوہر اور بچوں کو حیران کردیا۔

معلوم ہوا ہے کہ سعودی شہری کی صحت مند بیوی نے ان کی بیمار بیوی کو 80 فیصد جگر کا عطیہ دینے کی رضامندی ظاہر کی جس کے بعد ڈاکٹرز نے ان کے ضروری ٹیسٹ کرکے آپریشن کردیا، جگر عطیہ کرنے کا آپریشن کامیاب گیا اور دونوں خواتین کی حالت خطرے سے باہر تھی، سعودی خاتون کی جانب سے اپنی بیمار سوکن کو جگر کا 80 فیصد عطیہ کرنے کی خبر سن کو دنیا بھر کے لوگ حیران رہ گئے۔