فرانس، جیلی فش نے نیوکلیئرپاورپلانٹ بند کروا دیا

گرولین پاورپلانٹ فرانس کے سب سے بڑے جوہری پلانٹس میں شمار ہوتا ہے،رپورٹ

منگل 12 اگست 2025 16:17

فرانس، جیلی فش نے نیوکلیئرپاورپلانٹ بند کروا دیا

پیرس (اُردو پوائنٹ اخبارتازہ ترین - این این آئی۔ 12 اگست2025ء)فرانس کے شمالی علاقے میں واقع گرولین نیوکلیئر پاور پلانٹ کے 4 ری ایکٹرز جیلی فش کے ایک بڑے اور غیر متوقع ہجوم کے باعث بند کر دیے گئے۔ پلانٹ کے آپریٹر ای ڈی ایف کے مطابق کولنگ سسٹم کے فلٹر ڈرمز میں جیلی فش بھر جانے سے ری ایکٹرز خودکار نظام کے تحت بند ہو گئے۔

(جاری ہے)

گرولین پاور پلانٹ فرانس کے سب سے بڑے جوہری پلانٹس میں شمار ہوتا ہے، اس پلانٹ کے 6 یونٹس مجموعی طور پر 5.4 گیگا واٹ بجلی پیدا کرنے کی صلاحیت رکھتے ہیں۔

واقع کے وقت ری ایکٹرز 2، 3 اور 4 خودکار طور پر بند ہوئے جبکہ چند گھنٹوں بعد ری ایکٹر 6 بھی بند کر دیا گیا، پلانٹ کے باقی 2 یونٹس پہلے سے ہی مرمت کے لیے بند تھے، جس کے باعث پورے پلانٹ کی پیداوار عارضی طور پر معطل ہوگئی۔ای ڈی ایف کے مطابق فلٹر پمپ کو کوئی نقصان نہیں پہنچا، صرف صفائی کی ضرورت ہے، جس کے بعد ری ایکٹرز جلد دوبارہ چلنے کی توقع ہے، کمپنی کا کہنا تھا کہ اس واقعے سے پلانٹ، عملے یا ماحول کی سلامتی کو کوئی خطرہ نہیں ہوا۔