ساہیوال اور گردونواح میں بارش کا سلسلہ دوسرے روز بھی جاری

پیر 6 جنوری 2020 18:28

ساہیوال ۔ (اُردو پوائنٹ اخبارتازہ ترین - اے پی پی۔ 06 جنوری2020ء) ساہیوال اور گردونواح میں بارش کا سلسلہ دوسرے روز بھی جاری رہا ‘ بارش سے کاروباری علاقوں میں شہریوں کی خریدو فروخت کیلئے آمدورفت کم ہونے سے کاروبا رتقریباً ٹھپ رہا‘ بارش کے باعث سڑکوں کے کناروں اورنشیبی علاقوں میں پانی کھڑا رہا‘ سبزی وفروٹ منڈیوں میںکیچڑ بہت زیادہ ہونے سے شہری کم آئے تاہم مارکیٹ کمیٹی کے عملہ صفائی نے چرچ روڈ پر واقع سبزی منڈی میں صفائی کا اہتمام کیا اور کیچڑ اکٹھا کرکے ڈھیریاں لگاکر اٹھاتے رہے۔

(جاری ہے)

بارش سے سڑکوں پر پھسلن سے تیزرفتار موٹر سائیکل سوارگرکر معمولی زخمی ہوتے رہے۔ میٹر وپولیٹن کارپوریشن عملہ صفائی بعض علاقوںمیںصفائی کرتے دکھائی دیئے اور بارش کے پانی کو بھی نکالتے رہے۔ بارش کے باعث سکولز اور کالجز میں طلباء وطالبات اور سرکاری محکموں میں سرکاری ملازمین کی حاضری قدرے کم رہی۔ شہریوںنے بارش کے دوران عملہ صفائی کی طرف سے صفائی کرنے کے اقدام کو سراہا اور کہا کہ اگر عملہ صفائی روٹین میں باقاعدہ صفائی کرتار ہا تو شہر صاف ستھراہونے میںکوئی کسرباقی نہیں رہے گی۔