بلوچستان کے کئی علاقوں میں رات گئے زلزلے کے شدید جھٹکے

زلزلے کے شدید جھٹکے کوئٹہ اور صوبے کے دیگر کئی علاقوں میں محسوس کیے گئے، عوام میں خوف و ہراس پھیل گیا

محمد علی ہفتہ 18 جنوری 2020 22:19

کوئٹہ (اُردو پوائنٹ اخبارتازہ ترین۔ 18 جنوری2020ء) بلوچستان کے کئی علاقوں میں رات گئے زلزلے کے شدید جھٹکے، زلزلے کے شدید جھٹکے کوئٹہ اور بلوچستان کے دیگر کئی علاقوں میں محسوس کیے گئے، عوام میں خوف و ہراس پھیل گیا۔ تفصیلات کے مطابق پاکستان ان دنوں مسلسل شدید زلزلوں کی زد میں ہے۔ آج ہفتے کی شب کو بلوچستان کے مختلف علاقوں میں پھر سے زلزلے کے شدید جھٹکے محسوس کیے گئے ہیں۔

زلزلے کے جھٹکے صوبائی دارالحکومت کوئٹہ اور صوبے کے دیگر علاقوں میں محسوس کیے گئے۔ بتایا گیا ہے کہ زلزلے کے جھٹکے اس قدر شدید تھے کہ عمارتیں لرز گئیں۔ ان علاقوں میں اس وقت موسم شدید سرد ہے اور برفباری و بارش کا سلسلہ بھی جاری ہے۔ تاہم اس کے باوجود لوگ خوف زدہ ہو کر گھروں اور عمارتوں سے باہر نکل آئے۔

(جاری ہے)

اس دوران لوگ مسلسل اور باآواز بلند کلمہ طیبہ کا ورد کرتے رہے۔

تاہم زلزلے کے باعث کسی جانی و مالی نقصان کی اطلاع نہیں ملی۔ جبکہ زلزلے کی شدت، مرکز اور گہرائی کے حوالے سے تفصیلات حاصل کرنے کی کوشش کی جا رہی ہے۔ واضح رہے کہ گزشتہ ماہ پاکستان میں ایک سے زائد مرتبہ شدید زلزلے آئے۔ سب سے شدید زلزلے کی شدت 6 سے زائد رہی تھی۔ جبکہ دسمبر کے آخری ایام میں ایک دن میں چند ہی منٹوں کے وقفے سے تین مرتبہ شدید زلزلہ آیا تھا۔ ماہرین بھی خبردار کر چکے ہیں 2020 پاکستان کیلئے خطرناک ثابت ہو سکتا ہے، رواں برس پاکستان مسلسل زلزلوں کی زد میں رہے گا۔