کریم کی جانب سے خواتین کے لیے ایک اور شاندار سفری سہولت متعارف کرا دی گئی

ویمن آن وہیلز نامی سروس کی بدولت خواتین مسافروں کو خواتین ڈرائیورز کے ذریعے ہی بائیک پر سفر کی سہولت مِل جائے گی، Wow کے نام سے کریم ایپ بھی متعارف کرا دی گئی

جمعہ جنوری 19:37

کریم کی جانب سے خواتین کے لیے ایک اور شاندار سفری سہولت متعارف کرا دی ..
کراچی(اُردو پوائنٹ تازہ ترین اخبار۔ 24جنوری 2020ء) پاکستان میں عوام کو اُن کے گھروں کی دہلیز پر سفری سہولت فراہم کرنے والی کریم کی جانب سے پاکستانی خواتین کے لیے سفر سے متعلق ایک اور شاندار سہولت متعارف کرا دی گئی ہے۔ Wow (women on wheels) نامی اس سروس کے تحت خواتین صارفین کو بائیک پر سفر کی سہولت بھی مِل جائے گی،ان بائیک کی کپتان بھی خواتین ہی ہوں گی۔

تاکہ خواتین کو بائیک کے سفر کے دوران کسی قسم کی پریشانی کا سامنا نہ کرنا پڑے۔خواتین مسافروں کے لیے خواتین ڈرائیورز کی جانب سے بائیک کے سفر کی اس سہولت کا اعلان خواتین کپتانوں کو ڈرائیونگ لائسنس کے اجراء کی تقریب کے موقع پر کیا گیاجو کراچی کی آرٹس کونسل میں منعقد ہوئی۔ Wow نامی اس سفری سہولت کا آغاز ایس ایس ایف (سلمان صوفی فاؤنڈیشن) کی جانب سے کیا گیا ہے۔

(جاری ہے)

کریم اور ایس ایس ایف باہمی اشتراک سے Wow کے تحت زیر تربیت خواتین کی مالی معاونت کریں گی جس کا اہتمام جے ایس بینک کی جانب سے کیا جا رہا ہے۔ Wow نامی اس سفری سہولت کو کریم ایپ میں بھی اسی نام سے شامل کر لیا گیا ہے۔ Wow کا آغاز ایس ایس ایف (سلمان صوفی فاؤنڈیشن) کی جانب سے کیا گیا ہے۔کریم اور ایس ایس ایف باہمی اشتراک سے Wow کے تحت زیر تربیت خواتین کی مالی معاونت کریں گی جس کا اہتمام جے ایس بینک کی جانب سے کیا جا رہا ہے۔

اس حوالے سے منعقدہ تقریب کے دوران Wow کے تحت بائیک چلانے کی کامیاب تربیت حاصل کرنے والی خواتین کو ڈرائیونگ لائسنس تقسیم کیے گئے جبکہ ایس ایس ایف کی جانب سے تربیت مکمل کرنے والی خواتین کو سرٹیفکیٹس سے بھی نوازا گیا۔ ایس ایس ایف کے پلیٹ فارم سے موٹر بائیک ڈرائیونگ حاصل کرنے والی خواتین کو کریم کپتان کے طور پر اپنے کیریئر کا آغاز کرنے کی سہولت بھی دی جا رہی ہے۔

اس تقریب میں سندھ کی صوبائی وزیر برائے ہیومن ڈویلپمنٹ محترمہ شہلا رضا، ممبر سندھ اسمبلی فریال تالپور، وزیر اعلیٰ سندھ کے مشیر برائے قانونی امور مرتضیٰ وہاب نے بھی شرکت کی۔ تقریب میں کریم کی نمائندگی جنرل مینجر ساؤتھ اسد حیدر خان نے کی اور ایس ایس ایف کی نمائندگی اس فلاحی تنظیم کے سربراہ سلمان صوفی کی جانب سے کی گئی۔ سلمان صوفی پاکستانی خواتین کے حقوق کے لیے اپنی سرگرمیوں اور موثر فلاحی منصوبوں کے باعث دُنیا بھر میں اپنی پہچان رکھتے ہیں۔

کریم کے جنرل مینجر ساؤتھ اسد حیدر نے اس موقع پر خطاب کرتے ہوئے کہا کہ پاکستان میں خواتین کی بہتری اور ان کی سماجی و معاشی مضبوطی کی خاطر کریم ہمیشہ پیش پیش رہا ہے اور اس مقصد کی خاطر کریم نے کئی اہم اقدامات اُٹھائے ہیں۔ کریم کی جانب سے اپنی خواتین کپتانوں کی گنتی میں اضافے کے لیے بھرپور کوششیں کی جا رہی ہیں اور اپنے پلیٹ فارم کے ذریعے اُنہیں معاشی لحاظ سے خود کفیل بنایا جا رہا ہے۔

ہمیں یقین ہے کہ Wow کی سہولت سے نہ صرف خواتین کے لیے منفی تاثر زائل ہوں گے بلکہ اُنہیں ملازمتوں کے مواقع حاصل ہونے کے ساتھ ساتھ کم قیمت سفر کی سہولت بھی حاصل ہو گی۔ ایس ایس ایف فاؤنڈیشن کے سربراہ سلمان صوفی نے تقریب سے خطاب کے دوران کہا ”ہماری فاؤنڈیشن سندھ میں بھی اُسی سطح کی انقلابی تبدیلیاں لانے کے عزم پر کاربند ہے ، جس طرح کی پنجاب میں لائی گئی ہیں۔

کراچی میں فاؤنڈیشن کا دائرہ کار بڑھانے کے بعد ہم Wow پروگرام کو سندھ کے دیگر تین اضلاع میں بھی لانچ کریں گے۔ آج کی یہ تقریب ہماری جانب سے سندھ کی خواتین کو بااختیار بنانے کی جانب پہلا قدم ہے اور اس کے لیے ہم سندھ حکومت اور کریم کے شکر گزار ہیں جنہوں ہمارے Wow پروگرام سے تربیت حاصل کرنے والی خواتین کو سہولتوں کی فراہمی میں بھرپور تعاون دیا ہے۔

“اس موقع پر کریم کی جانب سے جے ایس بینک کے تعاون سے Wow کی تربیت یافتہ خواتین کو بائیک کی فراہمی سے متعلق منصوبے کا اعلان بھی کیا گیا ۔جو کریم کے پلیٹ فارم پر رجسٹریشن کرانے کے بعدبرسرروزگار ہو سکتی ہیں۔ جے ایس بینک اور کریم کے باہمی اشتراک سے Wow کی کیٹگری میں مزید 10 ہزار خواتین کو ملازمتیں فراہم کی جائیں گی۔ ویمن آن وہیلز جیسے اقدام اور خواتین کو بائیک کے ذریعے روزگار دینے کی سہولت سے جہاں ایک طرف خواتین کے معاشی حالات میں بہتری آئے گی، وہاں اُن کی سماجی شعبے میں شراکت داری اور خود کفالت میں بھی اضافہ ہوگا۔


 کریم کیا ہے؟
کریم مشرقِ وسطیٰ بھرکے علاوہ دیگر کئی ایشیائی ممالک میں سفری خدمات فراہم کرنے والا ایک آن لائن پلیٹ فارم ہے۔ درحقیقت کریم اس خطے میں سفری سہولیات فراہم کرنے کے کاروبار کا بانی ادارہ ہے۔ کریم کے پلیٹ فارم کی جانب سے اپنے صارفین کو نئی سے نئی سہولیات دی جا رہی ہیں جن میں سفر کی سہولت، مختلف اشیاء کی ڈلیوری اور رقوم کی ادائیگی وغیرہ شامل ہے۔

کریم کا مقصد لوگوں کی زندگیوں میں بہتری اور آسانی لانا ہے اور انہیں لمبے عرصے کے لیے مختلف سہولیات کی فراہمی ہے۔ کریم کا آغاز جولائی 2012ء میں ہوا۔ جس کے بعد اس کا دائرہ کار دُنیا کے 14 مختلف ممالک کے 100سے زائد شہروں میں پھیل چُکا ہے۔ کریم کی بدولت 10 لاکھ سے زائد افراد روزگار سے منسلک ہونے کے باعث اپنے خاندانوں کی کفالت کر رہے ہیں۔ کریم کے بارے میں مزید تفصیلات ویب سائٹ www.careem.com سے حاصل کی جا سکتی ہیں ۔