چین میں نومولود بچے میں کورونا وائرس کی تشخیص، متاثرہ افراد میں سب سے کم عمر

بیجنگ (اُردو پوائنٹ اخبارتازہ ترین - اے پی پی۔ 06 فروری2020ء) چین میں ایک نومولود بچے میں پیدائش کے صرف 30 گھنٹے بعد کورونا وائرس کی تشخیص ہوئی ہے۔ برطانوی خبر رساں ادارے نے سرکاری میڈیا کے حوالے سے بتایا کہ یہ بچہ اب تک کورونا وائرس سے متاثر ہونے والے افراد میں سب سے کم عمر ہے، یہ بچہ 2 فروری کو ووہان کے ایک مقامی ہسپتال میں پیدا ہوا جو اس وباء کا مرکز ہے، بچے کی پیدائش سے قبل بچے کی والدہ کے ٹیسٹ کیے گئے تھے جو مثبت آئے تھے تاہم ابھی تک یہ واضح نہیں ہو سکا کہ یہ بیماری کیسے منتقل ہوئی۔

سرکاری میڈیا نے بتایا کہ کورونا وائرس کے ساتھ پیدا ہونے والے اس بچے کا وزن سوا 3 کلو ہے اور اس کی حالت اب ٹھیک ہے جبکہ اسے زیر مشاہدہ رکھا گیا ہے۔کورونا وائرس سے اب تک 563 افراد ہلاک جبکہ 28 ہزار سے زائد افراد متاثر ہو چکے ہیں جبکہ یہ وائرس دوسرے ممالک میں بھی پھیل چکا ہے اور چین سے باہر اس سے متاثرہ 191 کیس سامنے آئے ہیں تاہم ان میں ہلاکتوں کی تعداد صرف 2 ہے۔

(جاری ہے)

چین کے نیشنل ہیلتھ کمیشن نے بتایا کہ ہلاک ہونے والے 80 فیصد افراد کی عمریں 60 سال سے زائد تھیں جبکہ ان 80 فیصد افراد میں سے 75 فیصد وہ تھے جو پہلے ہی کسی نہ کسی بیماری کا شکار تھے۔ ایک سینئر معالج نے ہانگ کانگ کے اخبار ساؤتھ چائنہ مارننگ پوسٹ کو بتایا کہ یہ کیس اس طرف اشارہ ہے کہ ہمیں وائرس کے ممکنہ نئے ٹرانسمیشن روٹ بارے فکر مند ہونے کی ضرورت ہے۔ واضح رہے کہ ڈبلیو ایچ او کے سربراہ ٹیڈروس اڈہانم نے چین کے علاوہ دیگر ممالک میں کورونا وائرس کے بڑھتے ہوئے کیسز کے پیشِ نظر گزشتہ روز 3 ماہ کی جوابی منصوبہ بندی کے لے 675 ملین ڈالر فنڈز کی اپیل کی۔