محکمہ زراعت نے زرعی آلات و مشینری کی رعایتی قیمت پر فراہمی کیلئے کاشتکاروں سے درخواستیں طلب کرلیں

جمعہ 6 مارچ 2020 17:54

فیصل آباد (اُردو پوائنٹ اخبارتازہ ترین - اے پی پی۔ 06 مارچ2020ء) : محکمہ زراعت توسیع نے وزیر اعظم پاکستان کے زرعی ایمرجنسی پروگرام کے تحت تیلدار اجناس کی پیداوار کے فروغ کے قومی منصوبہ کے تحت 50فیصد رعایتی قیمت پر کاشتکاروں کو پلانٹر/ڈرل،تھریشر اور کمبائن ہیڈر فراہم کرنے کیلئے ان سے 20 مارچ بروز جمعہ تک درخواستیں طلب کر لی گئیں ہیں ۔ ڈپٹی ڈائریکٹر زراعت توسیع چوہدری خالد محمود نے جمعہ کے روز اے پی پی کو بتایا کہ فیصل آباد بھر سے ایسے کاشتکار جو25 ایکڑ تک ذاتی زمین ،مزارع یاٹھیکیدار ہوں اور کم از کم50 ہارس پاور ٹریکٹر کے مالک ہوں وہ درخواست دینے کے اہل ہوں گے جبکہ زرعی رقبہ کی مشترکہ ملکیت کی صورت میں خاندان کا صرف ایک فرد اس سکیم سے مستفید ہو سکے گا۔

درخواست گزار زرعی مشینری کے حصول کیلئے اپنے ضلع میں درخواست جمع کروانے کا پابند ہوگا۔

(جاری ہے)

درخواست گزار ایک یا ایک سے زائد زرعی مشینری کیلئے درخواست جمع کروا سکے گا۔اس سکیم کے تحت حاصل کردہ مشینری کو درخواست گزار3 سال تک دوسرے کسانوں کو دینے کا پابند ہوگا۔ انہوں نے بتایا کہ کامیاب ہونے والے کاشتکاروں کی قرعہ اندازی والے دن سے 15 یوم کے اندراندر کسی منظور کردہ فرم سے مجوزہ زرعی مشینری کی بکنگ کا پابند ہوگا۔

زرعی آلات و مشینری کی الاٹمنٹ کے متعلق الاٹمنٹ کمیٹی ،ناظم اعلیٰ زراعت(توسیع) پنجاب کا فیصلہ حتمی ہوگا۔ انہوں نے بتایا کہ درخواست گزار شناختی کارڈ، ٹریکٹر کی رجسٹریشن بک ،زرعی رقبہ کی فردملکیت کی تصدیق شدہ کاپیاں 100روپے کے اشٹام پر بیان حلفی کے ساتھ درخواست جمع کروانا ہوگی۔درخواست فارم متعلقہ اسسٹنٹ ڈائریکٹر،ڈپٹی ڈائریکٹر اور ڈویژنل ڈائریکٹر زراعت کے دفتر سے مفت حاصل کر سکتے ہیں۔درخواست گذار محکمہ زراعت پنجاب کی ویب سائٹwww.agripunjab.gov.pkسے ڈاؤن لوڈ بھی کر سکتے ہیں۔مکمل درخواستیں متعلقہ اسسٹنٹ دائریکٹر زراعت(توسیع) کے دفتر میں 20 مارچ2020 تک وصول کی کر لی جائیں گی جبکہ قرعہ اندازی 10اپریل2020 کو کی جائے گی ۔