وزیر اعلیٰ سندھ سید مراد علی شاہ کی فعالیت اورحسنِ کارکردگی قابل تعریف ہے، مفتی منیب الرحمن

اسلام آباد (اُردو پوائنٹ اخبارتازہ ترین - آن لائن۔ 19 مارچ2020ء) مرکزی رویت ہلال کمیٹی پاکستان کے چیئرمین مفتی منیب الرحمٰن نے کہا ہے کہ دیگر وزرائے اعلیٰ کے مقابلے میں وزیر اعلیٰ سندھ نے کرونا کی وبا کا مقابلہ کرنے کے لیے زیادہ فعالیت اور حسن کارکردگی کامظاہرہ کیا ہے جو قابل تحسین ہے، ہم خیر کے کاموں میں تعاون اپنی دینی ذمے داری سمجھتے ہیں۔

لیکن اس کے ساتھ ساتھ وزیر اعلیٰ کی توجہ اس جانب مبذول کرانا چاہتے ہیں کہ یومیہ روزی کمانے والے شدید مشکل میں ہیں اور یہ بھی ایک انسانی مسئلہ ہے، لہٰذا ان کے لیے کوئی درمیانی راستہ نکالیں تاکہ یہ مہم کسی کے لیے بلا نہ بنے اور لوگوں کی دعائیں سمیٹیں۔ اپنے ایک بیان میں ان کا کہنا تھا کہ ہم پوری قوم سے اپیل کرتے ہیں کہ اس موقع پر حب الوطنی کا ثبوت دیں، حکومت کے ساتھ تعاون کریں، اس مرض کا علاج صرف اور صرف احتیاط میں ہے، لہٰذا سب احتیاطی تدابیر پر عمل کریں، نیز جمعة المبارک کو انفرادی اور اجتماعی طور پر توبہ، دعا اور استغفار کریں۔

(جاری ہے)

انہوں نے کہا:توبہ ودعا سے احتیاطی تدابیر اور انتظامی اقدامات کی نفی مقصود نہیں ہوتی، بلکہ اس کی برکت سے اللہ تعالیٰ انسانی کاوشوں کو کامیابی عطا فرماتا ہے، لہٰذا دوا اور دعا دونوں کا سلسلہ ساتھ ساتھ چلنا چاہیے۔ انہوں نے مزید کہا:اسی طرح ہم تاجروں سے اپیل کرتے ہیں کہ یہ ایثار کا موقع ہے، انسانیت نوازی کا موقع ہے، لوگوں کے دکھ درد بانٹنے کا موقع ہے، اسے ذخیرہ اندوزی اور نفع اندوزی کے لیے استعمال نہ کیا جائے۔