ایران نے کورونا وائرس پر امریکی مدد کی پیشکش کو مسترد کردیا

کورونا وائرس پر اٴْٹھائے گئے سخت اقدامات میں 2 سے 3 ہفتوں میں نرمی متوقع ہے، آیت اللہ خامنہ ای امریکا دروغ گوئی سے کام لے رہا ہے، اگر وہ مدد کا خواہاں ہوتا تو غیر آئینی پابندیاں ہٹا دیتا، سپریم لیڈر کا بیان

اتوار 22 مارچ 2020 20:50

ایران نے کورونا وائرس پر امریکی مدد کی پیشکش کو مسترد کردیا
تہران(اُردو پوائنٹ اخبارتازہ ترین - این این آئی۔ 22 مارچ2020ء) ایران کے سپریم لیڈر آیت اللہ خامنہ ای نے کورونا وائرس پر صدر ٹرمپ کی مدد کی پیشکش کو مسترد کرتے ہوئے امریکا سے اقتصادی پابندیاں ہٹانے کا مطالبہ کیا ہے۔عالمی میڈیا کے مطابق ایران کے سپریم لیڈر آیت اللہ خامنہ ای نے امریکی صدر ڈونلڈ ٹرمپ کی کورونا وائرس پر ادویہ کی فراہمی اور علاج معالجے کی پیشکش کو عجیب قرار دیتے ہوئے کہا کہ امریکی پابندیوں کے نتیجے میں ایرانی عوام غذا، ادویہ اور کاروبار سے دور ہوئی۔

(جاری ہے)

ایران کے روحانی پیشوا نے ایران کو کورونا وائرس سے بچائو کیلئے مدد کیلئے ’درخواست‘ کرنے کے امریکی مطالبے پر کہا کہ کورونا وائرس کے امریکی لیبارٹری میں تیار ہونے کے الزامات سامنے آرہے ہیں تو کوئی ذی شعور اٴْن سے مدد کیوں مانگے گا جو وائرس پیدا کرنے کے ذمہ دار ہوں۔ایرانی سپریم لیڈر نے امریکا سے ظالمانہ اقتصادی پابندیوں کو ہٹانے کا مطالبہ کرتے ہوئے کہا کہ امریکا دروغ گوئی سے کام لے رہا ہے، اگر وہ مدد کا خواہاں ہوتا تو غیر آئینی پابندیاں ہٹا دیتا جس سے ایرانی عوام کی ادویہ، خوراک اور انسانی ضروریات کی اشیا تک رسائی حاصل ہوجائے گی۔