کاشتکاروں کی خوشحالی کیلئے ہر ممکن اقدام کیا جا رہا ہے،ملک نعمان احمد

اوکاڑہ (اُردو پوائنٹ اخبارتازہ ترین - اے پی پی۔ 15 مئی2020ء) صوبائی وزیر زراعت پنجاب ملک نعمان احمد لنگڑیال نے کہا ہے کہ وفاقی حکومت کے 56ارب روپے سے زائدکا زرعی پیکج زرعی ترقی اور کاشتکاروں کی خوشحالی کیلئے ایک اہم سنگ میل ثابت ہو گا، وزیر اعظم عمران خان کے ویژن کے مطابق کاشتکاروں کی خوشحالی کیلئے ہر ممکن اقدام کیا جا رہا ہے تاکہ ہماری فی ایکڑ زرعی پیداوار میں اضافہ ہو سکے اور ملکی معیشت کو مضبوط بنایا جا سکے۔

ان خیالات کااظہارانہوں نے میڈیا سے گفتگو کرتے ہوئے کیا۔انہوں نے کہا کہ موجودہ حکومت نے کورونا وائرس کی وباء کے باوجود کاشتکاروں کی خوشحالی کیلئے ایک مثالی پیکج دیا ہے جس کے تحت کسانوں کو کھادوں پرسبسڈی، زرعی قرضوں پر شرحِ سود میں کمی لانے کے ساتھ کپاس کے بیج اور سفید مکھی کے خاتمہ کیلئے کیڑے مار ادویات و کھادوں کی خریداری اور مقامی طور پر تیار ہونے ٹریکٹروں پر سیلز ٹیکس پر بھی سبسڈی دی جائے گی۔

(جاری ہے)

وزیر زراعت پنجاب نے کہا کہ اس زرعی پیکج کے تحت کاشتکاروں کی پیداواری لاگت میں کمی کیلئے کھادوں کی خریداری پر 37 ارب روپے کی سبسڈی دی جا رہی ہے جس سے ڈی اے پی اور فاسفیٹ کھادوں کی فی بوری پر 925 روپے جبکہ یوریا اور نائٹروجن کھادوں پر فی بوری243 روپے فی بوری پرسبسڈی دی جائے گی۔ اس زرعی پیکج سے صوبہ میں کھادوں کے متوازن استعمال اور فی ایکڑ زرعی پیداوار میں اضافہ ہو گا۔

وزیر زراعت پنجاب ملک نعمان احمد لنگڑیال نے بتایا کہ اس پیکج کے تحت کاٹن سیڈ اور سفید مکھی کے خاتمہ کیلئے بالترتیب6 اور25 ارب روپے کی خطیر رقم بھی مختص کی گئی ہے جس سے کپاس کے کاشتکاروں کی پیداواری لاگت میں کمی اور فی ایکڑ پیداوار میں اضافہ ہو گا ۔وزیر زراعت پنجاب نے وفاقی حکومت کے اس زرعی پیکج کو سراہتے ہوئے کہا کہ موجودہ زرعی پیکج کو کسان تنظیموں اور کاشتکاروں نے زرعی ترقی کیلئے نہایت اہم قرار دیا ہے۔ اقتصادی رابطہ کمیٹی نے اس زرعی پیکج کی منظوری دے کر کاشتکاروں کی پیداواری لاگت میں کمی کیلئے ایک بروقت قدم اٹھایا ہے جس سے اب کاشتکاربروقت زرعی مداخل خرید پائیں گے۔انہوں نے مزید کہا کہ موجودہ حکومت کی ترجیحات میں زرعی ترقی سرِ فہرست ہے۔