پنجاب کی صوبائی کابینہ میں شامل چار وزراء کے سر پر خطرے کی تلوار لٹک گئی

وزراء میں ڈاکٹر مرادراس، اجمل چیمہ، اعجاز عالم سمیت ایک اور وزیر شامل، دو وزراء کا قلم دان تبدیل کئے جانے کا امکان، دیگر دو وزراء کی وزارت بھی ختم کئے جانے کا امکان ہے: ذرائع

ہفتہ 11 جولائی 2020 20:35

لاہور (اُردو پوائنٹ اخبارتازہ ترین - آن لائن۔ 11 جولائی2020ء) پنجاب کی صوبائی کابینہ میں شامل چار وزراء کے سر پر خطرے کی تلوار لٹک گئی ہے۔ اس سلسلے میں پی ٹی آئی ذرائع کا کہنا ہے کہ مذکورہ وزراء جن میں ڈاکٹر مرادراس، اجمل چیمہ، اعجاز عالم سمیت ایک اور وزیر شامل ہے میں سے دو وزراء کا قلم دان تبدیل کئے جانے کا امکان ہے جبکہ دیگر دو وزراء کی وزارت ختم کئے جانے کا امکان ہے ذرائع کے مطابق جن دو وزراء کا قلم دان تبدیل کیا جاسکتا ہے۔

(جاری ہے)

ان میں ڈاکٹر مرادراس اور ایک اور وزیر شامل ہیں جبکہ صوبائی وزیر اجمل چیمہ اور اعجاز عالم سے ان کی وزارتوں کا قلم دان واپس لیا جاسکتا ہے۔ یہ بھی بتایا گیا ہے کہ پنجاب کی صوبائی کابینہ کے آئندہ اجلاس میں وزیراعلیٰ پنجاب سردار عثمان بزدار مزید 6 صوبائی وزراء کو اپنی کارکردگی بہتر بنانے کی ہدایات کر سکتے ہیں۔ کابینہ میں تبدیل آئندہ چند روز میں متوقع ہے پہلے کابینہ میں تبدیلی پر عملدرآمد جون کے مہینے میں کیا جانا تھا لیکن پنجاب حکومت کے بجٹ اجلاس اور بجٹ کی منظوری کے پیش نظر کابینہ میں رد و بدل کا معاملہ موخر کردیا گیا تھا۔