ٹرانسپورٹ گروپ کی درآمدات میں گذشتہ مالی سال کے دوران49.90 فیصد کمی ہوئی ، ادارہ برائے شماریات

جمعرات 20 اگست 2020 13:27

اسلام آباد (اُردو پوائنٹ اخبارتازہ ترین - اے پی پی۔ 20 اگست2020ء) گزشتہ مالی سال 2019-20ء کے دوران ٹرانسپورٹ گروپ کی درآمدات میں 49.90 فیصد کمی ہوئی ہے۔ ادارہ برائے شماریات پاکستان (پی بی ایس) کی رپورٹ کے مطابق گزشتہ مالی سال میں درآمدات کا حجمم ایک ارب 54 کروڑ 59 لاکھ 34 ہزار ڈالر تک کم ہو گیا جبکہ مالی سال 2018-19 کے دوران ٹرانسپوٹ گروپ کی درآمدات کا حجم 3 ارب 8 کروڑ 58 لاکھ 72ہزار ڈالر رہا تھا۔

اس طرح مالی سال 2018-19ء کے مقابلہ میں گزشتہ مالی سال 2019-20ء کے دوران ٹرانسپورٹ گروپ کی درآمدات کا حجم ایک ارب 53 کروڑ 99 لاکھ 38 ہزار ڈالر یعنی 49.90 فیصد کی نمایاں کمی ریکارڈ کی گئی ہے۔ پی بی ایس کے مطابق گزشتہ مالی سال میں سڑکیں تعمیر کرنے والی مکمل تیار شدہ مشینری کی درآمدات میں 44.54 فیصد کمی ہوئی اور درآمدات کا حجم 2 ارب 30 کروڑ 62 لاکھ 81 ہزار ڈالر کے مقابلہ میں ایک ارب 27 کروڑ90 لاکھ 42 ہزار ڈالر تک کم ہو گیا جبکہ بسوں، ٹرکوں سمیت دیگر بھاری گاڑیوں کی درآمدات کا حجم بھی 24.51 فیصد کی کمی سے 15 کروڑ 59 لاکھ 80 ہزار ڈالر کے مقابلہ میں 11 کرور 77 لاکھ 52 ہزار ڈالر تک کم ہو گیا۔

(جاری ہے)

اسی طرح مالی سال 2018-19ء کے مقابلہ میں گزشتہ مالی سال کے دوران کاروں کی درآمدات میں بھی 55.41 فیصد جبکہ موٹر سائیکلز کی درآمدات میں 71.63 فیصد کمی ریکارڈ کی گئی ہے۔