چین میں سرکاری اہلکاروں پر ویکسین کی خفیہ آزمائشیں

چین خفیہ طور پر اہم سرکاری اہلکاروں پر گذشتہ ماہ سے ویکسین آزما رہا ہے،سینئر طبی عہدیدار

جمعرات 27 اگست 2020 14:14

چین میں سرکاری اہلکاروں پر ویکسین کی خفیہ آزمائشیں

بیجنگ(اُردو پوائنٹ اخبارتازہ ترین - این این آئی۔ 27 اگست2020ء) چین میں سرکاری اہلکاروں پر ویکسین کی خفیہ آزمائش کا انکشاف ہوا ہے،میڈیارپورٹس کے مطابق چین اپنے ملک میں اتنے بڑے پیمانے پر ویکسین ٹیسٹ نہیں کر سکتا کیونکہ یہ اپنے پاس وائرس کا پھیلائو روکنے میں نہایت کامیاب رہا ہے۔

(جاری ہے)

ہانگ کانگ یونیورسٹی کے سکول آف پبلک ہیلتھ کے پروفیسر بین کالنگ نے کہاکہ ویکسین تیار کرنے والی تمام کمپنیاں اپنے فیز تھری ٹرائل (آزمائش کا وہ مرحلہ جس میں ویکسین ہزاروں لوگوں کو دی جاتی ہے کے لیے ایسی جگہیں تلاش کر رہے ہیں جہاں کووڈ 19 اب بھی نسبتا بلند شرح سے پھیل رہا ہے۔

چین کے ایک سینئر طبی عہدیدار نے تصدیق کی کہ چین خفیہ طور پر اہم سرکاری اہلکاروں پر گذشتہ ماہ سے ویکسین آزما رہا ہے۔نیشنل ہیلتھ کمیشن کے ژینگ ژونگ وے نے سرکاری ٹی وی کو بتایا کہ تیاری کے مرحلے میں موجود غیر منظور شدہ ویکسینز کے استعمال کی اجازت دینے والے ہنگامی اختیارات کے ذریعے سرحدوں اور دیگر علاقوں میں موجود اہلکاروں کو ویکسین دی جا رہی ہے۔لیکن ویکسین کی سب سے پہلے تیاری ہی سب کچھ نہیں ہے، بلکہ اسے بڑے پیمانے پر تیار کرنا بھی ایک چیلنج ہوگا۔