آسٹریلیا، 6 ماہ کی مہلت مکمل ہونے پر بینک صارفین کو قرض ادائیگیاں شروع کرنے کی ہدایت

پیر 7 ستمبر 2020 12:46

سڈنی (اُردو پوائنٹ اخبارتازہ ترین - اے پی پی۔ 07 ستمبر2020ء) آسٹریلیا کے بینکوں نے کورونا وائرس کے باعث دی گئی چھ ماہ کی مہلت مکمل ہونے پراپنے صارفین سے کہا ہے کہ وہ اب قرضوں کی ادائیگیاں شروع کریں۔ خدشہ ظاہر کیا جارہا ہے کہ کچھ قرض دہندگان رقوم کی واپسی کے لئے اپنے گھر فروخت کرنے پر مجبور ہوجائیں گے۔ آسٹریلین بینکنگ ایسوسی ایشن (اے بی ای) نے بتایا ہے کہ ساڑھے 4 لاکھ صارفین کے لئے یہ مدت ختم ہوگئی ہے لہٰذا بینکوں نے 2لاکھ 60 ہزار کے رہن اور ایک لاکھ 5 ہزار تک کے کاروباری قرضوں کے حامل صارفین سے رابطے شروع کر دئیے ہیں۔

ایک مالیاتی ریگولیٹر کے مطابق اس وقت بینکوں کو 274 بلین آسٹریلین ڈالر (200 بلین ڈالر) مالیت کیادائیگیاں تعطل کا شکار ہیں ۔آسٹریلیا کی معیشت بحران سے گزر رہی ہے اور 1990ء کے بعد بے روزگاری کی شرح اپنی بلند ترین سطح پر ہے۔

(جاری ہے)

جو لوگ ادائیگیاں دوبارہ شروع کر سکتے ہیں انہیں صرف سود کی ادائیگی یا قرض میں توسیع کی پیشکش کی جاسکتی ہے جبکہ طویل مدتی ادائیگی کرنے سے قاصر افراد کو بھی موزوں پیشکش کی جائے گی۔

سمال بزنس آرگنائزیشن آسٹریلیا کی کونسل کے سی ای او پیٹر اسٹورونگ نے بینکوں پر زور دیا ہے کہ وہ ریاست وکٹوریہ میں اختتام ہفتہ پر مکمل لاک ڈاون میں توسیع کی وجہ سے وہان کیکاروباری قرض دہندگان کے معاملات کو فرداً فرداً دیکھیں۔واضح رہے کہ اس وقت آسٹریلیاکے بینکاری کے شعبہ کو دباؤ کا سامنا ہے۔کورونا وائرس کے بحران کی وجہ سے مارچ میں ملکی سرحدیں سیل اورمعیشت کا بیشتر حصہ بند ہونے پر بینکوں نے متاثرہ صارفین کو چھ ماہ کی مہلت دے رکھی تھی۔