ایشین روک بال چمپئن شپ آئندہ برس جون میں کھیلی جائیگی

ہفتہ 12 ستمبر 2020 22:38

اسلام آباد (اُردو پوائنٹ اخبارتازہ ترین - آن لائن۔ 12 ستمبر2020ء) ایشین روک بال چمپئن شپ آئندہ برس جون میں ملائیشیا میں کھیلی جائے گی۔ پاکستان روک بال فیڈریشن کی سیکرٹری جنرل امہ لیلیٰ کلثوم رانا نے بتایا کہ پاکستان روک بال فیڈریشن نے ایشین روک بال چمپئن شپ کی تیاریاں ابھی سے شروع کردی گئی ہیں اور یہ چمپئن شپ میں 6 ممالک کی ٹیمیں حصہ لے رہی ہیں جن میں پاکستان سمیت بنگلہ دیش، بھارت، سری لنکا، تھائی لینڈ اور میزبان ملائیشیا شامل ہیں، انہوں نے کہا کہ قومی ٹیم کے کھلاڑیوں کا چناؤ قومی روک بال چمپئن شپ کے دوران کیا جائیگا جس کو آئندہ ماہ اکتوبر میں منعقد کروانے کی منصوبہ بندی پاکستان روک بال فیڈریشن بنا رہی ہے۔

(جاری ہے)

امہ لیلیٰ کلثوم رانا نے کہا کہ کرونا وائرس کے باعث کھیلوں اور کھلاڑیوں کا بہت نقصان ہوا ہے اور اس کمی کو پورا کرنے کے لئے کم از کم چار ماہ کا عرصہ چاہیے، ایک سوال کے جواب میں انہوں نے کہا کہ قومی ٹیم کے کھلاڑیوں کا چناؤ میرٹ کی بنیاد پر کیا جائے گا۔