آئی جی پنجاب پولیس آفیسرز میس وپولیس کلب کا دورہ ، ترقیاتی کاموں کا جائزہ لیا

بدھ 23 ستمبر 2020 20:35

لاہور۔ (اُردو پوائنٹ اخبارتازہ ترین - اے پی پی۔ 23 ستمبر2020ء) انسپکٹر جنرل پولیس پنجاب انعام غنی نے کہاہے کہ پولیس آفیسرز میس اور پولیس کلب میں جاری ترقیاتی کاموں کو کوالٹی سٹینڈرڈ کے مطابق جلد از جلد مکمل کیا جائے تاکہ افسران واہلکاروں کیلئے تعمیری سرگرمیوں کے پروگرامز شیڈول کے مطابق باقاعدگی سے منعقد ہوتے رہیں،ایڈیشنل آئی جی ویلفیئراینڈ فنانس اپنی نگرانی میں زیر تکمیل پراجیکٹس کو مقررہ ٹائم لائن کے اندر مکمل کروائیں اور کام کے معیار کا جائزہ لینے کیلئے انسپکشن اور مانیٹرنگ بھی کرتے رہیں ۔

ان خیالات کا اظہار انہوں نے یہاںشاہراہ ایوان تجارت پر پولیس آفیسرز میس اور پولیس کلب میں جاری ترقیاتی کاموں کا جائزہ لیتے ہوئے کیا ۔ اس موقع پر ایڈیشنل آئی جی ویلفیئر اینڈ فنانس اظہر حمید کھوکھراور اے آئی جی ڈویلپمنٹ رانا طاہر رحمان خان سمیت دیگر افسران بھی موجود تھے ۔

(جاری ہے)

ایڈیشنل آئی جی ویلفیئر اینڈ فنانس اظہر حمید کھوکھرنے تزئین و آرائش کے حوالے سے جاری کاموں کے متعلق آئی جی پنجاب کوبریفنگ دیتے ہوئے بتایا کہ پولیس آفیسرز میس پراجیکٹ فورس کی ویلفیئر سرگرمیوں کو پایہ تکمیل تک پہنچانے میں معاون ثابت ہوگا۔

انہوں نے آئی جی پنجاب کوپولیس آفیسرز میس کے مختلف حصوں کادورہ کروایا اور زیر تکمیل کام کے متعلق تفصیلی آگاہ کیا جبکہ آئی جی پنجاب نے پولیس میس کو جلد از جلد فنکشنل بنانے بارے مختلف امور پر ہدایات بھی دیں۔