Live Updates

سیاحتی اور ویزٹ ویزا پر دبئی کا رخ کرنے والے پاکستانیوں کیلئے وارننگ جاری

ایسے تمام پاکستانی جو نوکری کے حصول کیلئے سیاحتی یا ویزٹ ویزا پر دبئی داخل ہونے کی کوشش کریں گے، انہیں ائیرپورٹ پر ہی ڈپورٹ کر دیا جائے گا: اماراتی حکام

محمد علی منگل 20 اکتوبر 2020 22:12

دبئی (اردوپوائنٹ اخبارتازہ ترین۔ 20 اکتوبر2020ء) سیاحتی اور ویزٹ ویزا پر دبئی کا رخ کرنے والے پاکستانیوں کیلئے وارننگ جاری کی گئی ہے۔ تفصیلات کے مطابق گزشتہ ایک ہفتے کے دوران دبئی جانے والے 1300 سے زائد پاکستانیوں اور 300 سے زائد ہندوستانیوں کو دبئی میں داخل ہونے کی اجازت نہیں ملی۔ ایک ہفتے کے دوران 1200 سے زائد پاکستانیوں کو دبئی ائیرپورٹ سے ڈی پورٹ کیا جا چکا ہے، جبکہ 98 پاکستانی ابھی بھی دبئی ائیرپورٹ پر پھنسے ہوئے ہیں۔

اس حوالے سے بتایا گیا ہے کہ اماراتی امیگریشن حکام دبئی آنے والے پاکستانی اور ہندوستانی شہریوں کی سختی سے چھان بین کر رہے ہیں۔ انکشاف ہوا ہے کہ سیاحتی اور ویزٹ ویزا پر دبئی کا رخ کرنے والے پاکستانیوں اور ہندوستانیوں کی بڑی تعداد دراصل نوکری کے حصول کیلئے امارات آ رہے ہیں، اس لیے دبئی ائیرپورٹ پر سخت چھان بین کی جا رہی ہے۔

(جاری ہے)

اماراتی امیگریشن حکام ایسے تمام پاکستانیوں اور ہندوستانیوں کو ڈی پورٹ کر رہے ہیں، جن پر شبہ ہے کہ وہ دبئی سیاحت کی بجائے نوکری کے حصول کیلئے آئے، اور ان کے پاس دستاویزات بھی مکمل نہیں ہیں۔

وارننگ جاری کی گئی ہے کہ ایسے تمام پاکستانی اور ہندوستانی جو نوکری کے حصول کیلئے سیاحتی یا ویزٹ ویزا پر دبئی داخل ہونے کی کوشش کریں گے، انہیں ائیرپورٹ پر ہی ڈپورٹ کر دیا جائے گا۔ گزشتہ ہفتے جاری ٹریول ایڈوائزری میں یہ بھی تلقین کی گئی تھی کہ پاکستان، بھارت، بنگلہ دیش، نیپال اور افغانستان سے تعلق رکھنے والے وہ تمام افراد جو سیاحتی یا ویزٹ ویزا پر دبئی آنا چاہتے ہیں، ان پر لازم ہے کہ ان کے پاس ریٹرن ٹکٹ بھی موجود ہے۔

جس بھی شہری کے پاس ریٹرن ٹکٹ موجود نہ ہوا، اسے دبئی میں داخل ہونے کی اجازت نہیں ہوگی۔ تمام ائیرلائنز کو ہدایت کی گئی ہے کہ وہ یہ بات یقینی بنائیں کہ سیاحتی یا ویزٹ ویزا پر دبئی آنے والے شخص کے پاس ریٹرن ٹکٹ موجود ہو، بصورت دیگر ڈی پورٹ کیے جانے کے بعد مسافر کے سفری اخراجات ائیرلائن کو برداشت کرنا ہوں گے۔