صحت سہولت پروگرام کا اجرا 31 اکتوبر کو ملاکنڈ ڈویڑن سے ہو گا، تیمور سلیم خان جھگڑا

ہفتہ 24 اکتوبر 2020 22:34

پشاور۔ (اُردو پوائنٹ اخبارتازہ ترین - اے پی پی۔ 24 اکتوبر2020ء) : خیبرپختونخوا کے وزیر صحت و خزانہ تیمور سلیم خان جھگڑا نے کہا ہے کہ وہ تاریخی دن قریب آ گیا جب خیبرپختونخوا کی تمام آبادی مفت علاج معالجے کی سہولت سے مستفید ہو گی،یونیورسل ہیلتھ انشورنس کا یہ منصوبہ دنیا کے صرف چند ممالک میں ہے اور خیبرپختونخوا پہلا صوبہ ہوگا جہاں تمام آبادی کا 10 لاکھ روپے تک سالانہ مفت علاج کرا سکے گی۔

صحت سہولت کارڈ کا اجرائ 31 اکتوبر سے ملاکنڈ ڈویڑن سے ہو رہا ہے۔

(جاری ہے)

اپنے ایک ٹوئٹر پیغام میں وزیر صحت و خزانہ کا کہنا تھا کہ چند دن قبل نادرا کے ساتھ ڈیٹا کے تبادلہ کا معاہدہ طے پا گیا ہے جس کے تحت شہریوں کو ہیلتھ انشورنس کی فراہمی میں آسانی ہو گی۔ تیمور جھگڑا کا کہنا تھا صوبے کی تمام آبادی کو ہیلتھ انشورنس کی فراہمی خیبرپختونخوا کی صوبائی حکومت کا تاریخی اور انقلابی منصوبہ ہے، منصوبے کے ابتدائی مرحلے میں صحت سہولت کارڈز سے ملاکنڈ ڈویڑن کے اضلاع سوات، ملاکنڈ، دیر اپر و لوئر اور چترال کی 70 لاکھ آبادی مستفید ہوگی جنہیں آئندہ ہفتے یہ سہولت فراہم کر دی جائے گی۔ اسی طرح مرحلہ وار جنوری تک صوبے کی تمام آبادی تک اس منصوبے کو توسیع دے دی جائے گی۔