ایس ایم ای سیکٹراور دیگر صنعتی سرگرمیوں کے فروغ کے لئے شرح سود میں کمی ناگزیر ہے۔ ایس ایم منیر، سلیم الزماں

کراچی۔24نومبر  (اُردو پوائنٹ اخبارتازہ ترین - اے پی پی۔ 24نومبر2020ء) :کورنگی ایسوسی ایشن آف ٹریڈ اینڈ انڈسٹری(کاٹی) کے سرپرست اعلیٰ ایس ایم منیر اور صدر سلیم الزماں نے کہا ہے کہ کورونا وائرس کے باعث دباؤ کا شکار معیشت کو سہارا دینے کے لیے ایس ایم ای سیکٹراور دیگر صنعتی سرگرمیوں کے فروغ کے لئے شرح سود میں کمی ناگزیر ہے تاہم اسٹیٹ بینک آف پاکستان کی جانب سے شرح سود برقرار رکھنے کا فیصلہ خوش آئند ہے۔

منگل کو جاری کردہ مشترکہ بیان میں ایس ایم منیر نے کہا کہ اسٹیٹ بینک کی مانیٹری کمیٹی کی جانب سے شرح سود برقرار رکھنے کا فیصلہ خوش آئند ہے ۔ انہوں نے کہا کہ رپورٹ میں بڑے صنعتی شعبوں کی پیدوار مستحکم ہونے اور برآمدات کی قبل از وبا ء سطح پر واپس آنے کے اعداد و شمار حوص    لہ افزا ہے، اس لیے وزیر اعظم عمران خان اور ان کی معاشی ٹیم مبارکباد کے مستحق ہیں۔

(جاری ہے)

صدر کاٹی سلیم الزماں نے کہا کہ مانیٹری کمیٹی کی رپورٹ کے مطابق ٹیکسٹائل، سیمنٹ، کیمیکل اور فاما سیوٹیکل صنعتوں کی پیدوار میں بہتری کے اعشاریے خوش آئند ہیں۔ انہوں نے کہ موجودہ حالات میں پالیسی ریٹ برقرار رکھنا دانش مندانہ اقدام ہے تاہم غذائی اجناس کی قیمتوں پر قابوپانے کے لیے جامع حکمت عملی ترتیب دینے کی ضرورت ہے۔ انہوں نے کہا کہ صنعتکار برادری وزیر اعظم کی جانب سے قومی صنعتی پالیسی کی  منظوری اور اس میں ملکی صنعتوں کو فروغ دینے کے لیے اہم اقدامات کے اعلان کی منتظر ہے۔

انہوں نے کہا کہ اس وقت صنعتوں کی پیدواری لاگت کے اعتبار سے گیس کی فراہمی میں تعطل اور زائد قیمتیں ہمارے لیے بڑا چیلنج ہے امید ہے وزیر اعظم صنعتی پالیسی میں اس حوالے سے اہم فیصلے کریں گے۔ سلیم الزماں نے کہا کہ حکومتی اقدامات سے کورونا وبا کی روک تھام کے اقدامات کے باوجود صنعتی پیدوار کا تسلسل اطمینان بخش حد تک برقرار رہا ہے تاہم ابھی یہ بحران پوری طرح ٹلا نہیں اس لیے صنعتوں کے مالیاتی استحکام کے لیے حکومتی معاونت اور آسان شرائط پر قرضوں کی فراہمی کا سلسلہ برقرار رکھنا ہوگا۔