چین ہمارے لیے سب سے بڑا خطرہ ہے‘ امریکی انٹیلی جنس

جوبائیڈن انتظامیہ انٹیلی جنس کو سیاست میں ملوث کرنے سے باز رہے‘جان ریٹکلف

جمعہ 4 دسمبر 2020 15:45

چین ہمارے لیے سب سے بڑا خطرہ ہے‘ امریکی انٹیلی جنس

واشنگٹن (اُردو پوائنٹ اخبارتازہ ترین - این این آئی۔ 04 دسمبر2020ء) امریکی انٹیلی جنس کے ڈائریکٹر جان ریٹکلف نے آئندہ صدر جو بائیڈن کی انتظامیہ کو خبردار کیا ہے کہ وہ انٹیلی جنس کوسیاست میں ملوث کرنے سے باز رہے۔ ریٹکلف نے اس بات پر زور دیا کہ یہ بات پوری سچائی کے ساتھ تسلیم کر لینا چاہیے کہ چین ہماری قومی سلامتی کو درپیش سب سے بڑا خطرہ ہے۔

فوکس نیوز چینل کے ساتھ ایک انٹرویو میں ریٹکلف کا کہنا تھا کہ انٹیلی جنس معلومات واضح ہیں کہ چین ہمارے لیے سب سے بڑا خطرہ ہے۔انٹیلی جنس سربراہ نے ان افراد کو تنقید کا نشانہ بنایا جو اس خطرے کو دیگر امور کے مساوی قرار دیتے ہیں مثلا ان کا کہنا ہے کہ روس ،،، امریکا کے لیے چین سے بڑا خطرہ ہے۔ریٹکلف کے نزدیک چین اقتصادی ، عسکری اور ٹکنالوجی کے لحاظ سے دنیا پر غلبہ پانے کا ارادہ رکھتا ہے۔

(جاری ہے)

انہوں نے کہا کہ یہ واحد ملک ہے جو تمام شعبوں میں امریکی برتری کو چیلنج کرنے کی قدرت رکھتا ہے۔ریٹکلف کے مطابق امریکا کو عسکری، اقتصادی، غیر ملکی سرمایہ کاری، ٹکنالوجی، سائبر وار، ففتھ جنریشن انٹرنیٹ اور ہر قسم کی مواصلات کے میدان میں درپیش تمام چیلنجوں میں چین موجود ہے۔ایک سوال کے جواب میں ریٹکلف کا کہنا تھا کہ چین سے متعلق موقف کے حوالے سے امریکا ابھی تک اقدامی پوزیشن میں ہے۔