ٹوئٹر نے ایرانی سپریم لیڈر کی برطانوی و امریکی ویکسین کیخلاف کی گئی ٹوئٹ ڈیلیٹ کردی

عربی اور انگریزی کے ٹوئٹر اکاؤنٹس سے ٹویٹ ہٹا دی گئی، اس ٹویٹ سے سوشل میڈیا پلیٹ فارم کے قوانین کی خلاف ورزی ہوئی، ٹوئٹر انتظامیہ

شہریار عباسی ہفتہ 9 جنوری 2021 23:08

ٹوئٹر نے ایرانی سپریم لیڈر کی برطانوی و امریکی ویکسین کیخلاف کی گئی ..

تہران (اردوپوائنٹ اخبار تازہ ترین۔ 09 جنوری 2021ء) سماجی رابطوں کی ویب سائٹ ٹوئٹر نے ایرانی سپریم لیڈر سید علی خامنہ ای کے امریکی و برطانوی کورونا ویکسین کیخلاف ٹویٹ کو ہٹا دیا ہے۔ غیر ملکی خبر رساں ادارے کی رپورٹ کے مطابق اس ٹوئٹ میں ایرانی سپریم لیڈر نے اپنے ٹوئٹ میں کہا تھا کہ یہ 'مکمل طور پر ناقابل اعتماد ہیں'۔ ٹوئٹر پر پوسٹ ایک تقریر میں انہوں نے کہا تھا کہ 'امریکہ اور برطانیہ کی ویکسین کی درآمد ممنوع ہے۔

اس کا امکان ہے کہ یہ دوسرے ممالک کو آلودہ کرنا چاہیں گے۔' انہوں نے یہ بھی کہا 'فرانس سے ایچ آئی وی سے متاثرہ خون کی سپلائی کے ہمارے تجربے کے پیش نظر، فرانسیسی ویکسین بھی قابل اعتماد نہیں۔' آیت اللہ سید علی خامنہ ای کے اس ٹوئٹ کے بعد ان کے عربی اور انگریزی کے ٹوئٹر اکاؤنٹس سے اس ٹویٹ کو ڈیلیٹ کردیا گیا ہے۔

(جاری ہے)

جبکہ ان کے فارسی کے اکاؤنٹ پر اب بھی وہ تقریر موجود ہے۔

ٹوئٹر کا کہنا ہے کہ اس ٹویٹ سے سوشل میڈیا پلیٹ فارم کے قوانین کی خلاف ورزی ہوئی۔ واضح رہے کہ ایرانی سپریم لیڈر نے امریکی و برطانوی کورونا ویکسین کو ناقابل اعتماد قرار دے دیا ہے۔ غیر ملکی خبررساں ادارے کی رپورٹ کے مطابق ایران نے کہا کہ وہ سپریم لیڈر آیت اللہ علی خامنہ ای کے برطانیہ اور امریکہ کی طرف سے تیار کردہ ویکسینوں پر پابندی عائد کرنے کے بعد فائزر کے ذریعہ عطیہ کردہ ہزاروں کورونا وائرس ویکسینیں درآمد نہیں کرے گا۔

اس حوالے سے ایرانی ہلال احمر سوسائٹی نے تصدیق کی کہ وہ سید علی خامنہ ای کے اعلان کے بعد فائزر کے ذریعہ دی گئی اور تیار کردہ ویکسین قبول نہیں کی جائے گی۔ ایران کے ہلال احمر کے ترجمان کا کہنا تھا کہ "ہم اس بات کی تصدیق کر سکتے ہیں کہ ہلال احمر نے امریکہ سے کوروناوائرس کے لئے فائزر ویکسین کی ڈیڑھ لاکھ خوراکیں منسوخ کردی ہیں۔ " انہوں نے مزید کہا کہ "ہمارے ایک اتحادی روس ، چین اور ہندوستان کی طرف سے ہلال احمر کی سوسائٹی کو دس لاکھ کورونا وائرس کی ویکسین فراہم کی جائیں گی۔

" واضح رہے کہ ایرانی سپریم لیڈر نے آج تہران میں دیے گئے اپنے بیان میں برطانیہ اور امریکہ سے آنے والی ویکسینوں کو "مکمل طور پر ناقابل اعتماد" قرار دیا تھا۔ کورونا ویکسین کے حوالے سے ایرانی سپریم لیڈر سید علی خامنہ ای نے کہا ،" ملک میں امریکی اور برطانوی ویکسین کی درآمد ممنوع ہے، کیونکہ وہ مکمل طور پر ناقابل اعتماد ہیں۔ اس امکان کو رد نہیں کرسکتے کہ وہ دوسری اقوام کو آلودہ کرنا چاہیں۔