آرمی چیف سے اردن کے چیئر مین جوائنٹ چیف آف سٹاف کی ملاقات

اردن کی افواج کیساتھ دفاعی، سیکیورٹی تعاون کے فروغ کیلئے تیار ہیں، آرمی چیف جنرل قمر جاوید باجوہ

بدھ 27 جنوری 2021 23:36

آرمی چیف سے اردن کے چیئر مین جوائنٹ چیف آف سٹاف کی ملاقات

راولپنڈی(اُردو پوائنٹ اخبارتازہ ترین - این این آئی۔ 27 جنوری2021ء) آرمی چیف جنرل قمر جاوید باجوہ نے کہا ہے کہ اردن کی افواج کے ساتھ دفاعی، سیکیورٹی تعاون کے فروغ کے لیے تیار ہیں۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے اردن کے چیئرمین جوائنٹ چیفس آف اسٹاف نے ملاقات کی، جس میں باہمی و پیشہ ورانہ دلچسپی، علاقائی سیکیورٹی کی صورت حال پر تبادلہ خیال کیا گیا۔

آرمی چیف نے کہا کہ پاکستان اردن کے ساتھ برادرانہ تعلقات کو خصوصی اہمیت دیتا ہے، اردن کی افواج کے ساتھ دفاعی، سیکیورٹی تعاون کے فروغ کے لیے تیار ہیں۔آئی ایس پی آر کے مطابق اردن کے چیئرمین جوائنٹ چیفس آف اسٹاف نے علاقائی امن کے لیے پاک فوج کے کردار کو سراہا۔

(جاری ہے)

دوسری جانب چیئرمین جوائنٹ چیفس آف اسٹاف کمیٹی جنرل ندیم رضا سے بھی اردن کے ہم منصب نے ملاقات کی، جس میں باہمی و پیشہ ورانہ دلچسپی، علاقائی سیکیورٹی کی صورت حال پر گفتگو کی گئی۔

ترجمان پاک فوج کے مطابق دونوں جانب سے عالمی اور علاقائی سیکیورٹی کی صورت حال پر تبادلہ خیال کیا گیا، میجر جنرل یوسف احمد نے دہشت گردی کے خلاف پاک فوج کی قربانیوں کو سراہا۔علاوہ ازیں میجر جنرل یوسف احمد کو جوائنٹ اسٹاف ہیڈ کوارٹر پہنچنے پر گارڈ آف آنر پیش کیا گیا۔