عالمی ہوا بازی کی تنظیم اکاؤ رواں سال جولائی میں سول ایوی ایشن کا خصوصی آڈٹ کرے گی

سی اے اے نے اکاؤ کی جانب سے سیفٹی تحفظات دور کرنے کیلئے اقدامات کرلئے، رپورٹ

منگل 23 فروری 2021 15:53

اسلام آباد (اُردو پوائنٹ اخبارتازہ ترین - این این آئی۔ 23 فروری2021ء) عالمی ہوا بازی کی تنظیم اکاؤ رواں سال جولائی میں سول ایوی ایشن کا خصوصی آڈٹ کرے گی، سی اے اے نے اکاؤ کی جانب سے سیفٹی تحفظات دور کرنے کیلئے اقدامات کرلئے ہیں۔تفصیلات کے مطابق عالمی ہوا بازی کی تنظیم اکاؤ نے سول ایوی ایشن کا خصوصی آڈٹ کرنیکا فیصلہ کرلیا ، پاکستان سی اے اے کی یونیورسل سیفٹی اوور سیٹ آڈٹ 2021 جولائی سے شروع ہوگا۔

(جاری ہے)

اکاؤ کی آڈٹ ٹیم 5 جولائی کو پاکستان پہنچے گی اور 15جولائی تک خصوصی آڈٹ کیاجائے گا، ڈی جی سی اے اے خاقان مرتضیٰ اکاو کوسی اے اے سے متعلق، کپتانوں کے لائسنس اور دیگرامور پر تفصیلی بریفنگ دیں گے۔عالمی ہوا بازی کی تنظیم اکاؤ ٹیم سیفٹی آڈٹ سمیت فلائٹ اسٹینڈرڈودیگراقدامات پر عالمی معیار کے مطابق جانچ کرے گی اور اینکسچر 1تا 19گائیڈلائن کے تحت مکمل آڈٹ کرے گی۔ذرائع سی اے اے کے مطابق اکاؤ کی جانب سے سیفٹی تحفظات دور کرنے کیلئے اقدامات کرلئے ہیں، اکاؤ کو پچھلے سال نومبر میں آڈٹ کرنا تھا کورونا کی وجہ سے دورہ ملتوی ہواتھا۔