احساس پروگرام دنیا کے 4 بڑے پروگراموں میں شامل ہونے پر وزیراعظم خوش

ثانیہ نشتر اور احساس ٹیم کو یہ سنگِ میل بہت مبارک ہو کیوں کہ وہ اس اعزاز اور عالمی پذیرائی کے پوری طرح حقدار تھے۔ عمران خان کا ٹویٹ

ساجد علی اتوار 16 مئی 2021 14:21

احساس پروگرام دنیا کے 4 بڑے پروگراموں میں شامل ہونے پر وزیراعظم خوش

اسلام آباد( اُردو پوائنٹ تازہ ترین اخبار ۔ 16 مئی 2021ء ) عالمی بینک نے احساس ایمرجنسی کیش پروگرام کا شمار عالمی سطح کے پہلے 4 بڑے سماجی تحفظ پروگراموں میں کرلیا ، اس پر وزیر اعظم عمران خان کی طرف سے ردعمل سامنے آگیا۔ تفصیلات کے مطابق عالمی بینک نے عالمی سطح پر کوویڈ 19 سے نمٹنے کے لیے سماجی تحفظ پروگراموں پر مبنی رپورٹ جاری کردی ، لیونگ پیپر کے نام جاری کردہ رپورٹ 18 شراکت داروں اور معاونین کی مدد سے تیار کی گئی ہے ، یہ رپورٹ 650 صفحات پر مشتمل ہے اور اس میں بتایا گیا ہے کہ کس طرح سے مختلف ممالک اور خطے وبائی مرض کے تناظر میں سماجی تحفظ کے اقدامات کی منصوبہ بندی اور ان پر عمل درآمد کررہے ہیں، پاکستان کا احساس ایمرجنسی کیش پروگرام ان میں سے ایک ہے۔

اسی حوالے سے وزیر اعظم عمران خان نے سماجی رابطوں کی ویب سائٹ ٹوئٹر پر جاری کیے گئے اپنے ایک پیغام میں کہا ہے کہ معاون خصوصی سینیٹر ثانیہ نشتر اور احساس پروگرام کی پوری ٹیم کو یہ سنگِ میل بہت مبارک ہو کیوں کہ کہ وہ اس اعزاز اور عالمی پذیرائی کے پوری طرح حقدار تھے۔

(جاری ہے)

ثانیہ اور احساس ٹیم کو یہ سنگِ میل بہت مبارک کہ وہ اس اعزاز اور عالمی پذیرائی کے پوری طرح حقدار تھے۔
https://t.co/nl9c4T6UPr
— Imran Khan (@ImranKhanPTI) May 16, 2021

خیال رہے کہ رپورٹ میں کہا گیا ہے کہ 20 مارچ 2020ء سے 14 مئی 2021ء کے درمیان سماجی تحفظ کے اقدامات میں غیر معمولی اضافہ ہوا ہے اور 222 ممالک یا خطوں میں مجموعی طور پر 3333 سماجی تحفظ کے منصوبے بنائے گئے ہیں یا ان پر عمل درآمد کیا گیا ہے ، لوگوں کی شمولیت کی تعداد کے لحاظ سے پاکستان عالمی سطح پر چوتھے نمبر پر ہے اور 100 ملین سے زائد آبادی کی شمولیت کے لحاظ سے عالمی سطح پر پاکستان کا تیسرا نمبر ہے ، اس سلسلے میں صرف منتخب ممالک نے متاثر کن چھ ہندسوں کا ہدف حاصل کیا ہے ، پاکستان کا احساس ایمرجنسی کیش پروگرام ان میں سے ایک ہے، پاکستان کے احساس پروگرام کو ان پروگراموں میں اعلیٰ مقام حاصل ہے جنہوں نے منصوبہ بندی کے مقابلے میں اصل کوریج ریٹ کے لحاظ سے بہتر کارکردگی کا مظاہرہ کیا۔