Live Updates

پنجاب میں تباہی پھیلانے والا سیلاب سندھ میں داخل

گھوٹکی میں 20 سے زائد دیہات زیر آب، بالائی سندھ میں کچے کے کئی گاؤں ڈوب گئے، بیراجوں پر پانی کا دباؤبرقرار

ساجد علی ہفتہ 13 ستمبر 2025 12:31

گھوٹکی ( اُردو پوائنٹ اخبارتازہ ترین۔ 13 ستمبر2025ء ) صوبہ پنجاب میں تباہی پھیلانے والا سیلاب سندھ میں داخل ہوچکا ہے جہاں دریائے سندھ میں گڈو بیراج پر اونچے درجے کا سیلاب ریکارڈ کیا گیا۔ میڈیا رپورٹس کے مطابق سیلاب کے باعث بالائی سندھ میں کچے کے درجنوں گاؤں ڈوب چکے ہیں جہاں گھوٹکی میں کچے کے 20 سے زائد دیہات زیر آب آئے ہیں، کندھ کوٹ میں کچے کا 80 فیصد علاقہ سیلاب کی نذر ہوا ہے، اوباڑو، نوشہرو فیروز میں بھی کئی بستیاں ڈوب چکی ہیں، کمال ڈیرو کے قریب دریائے سندھ میں متاثرین کی کشتی الٹ گئی، مقامی افراد نے ڈوبنے والے پانچوں افراد کو بچایا، پنوعاقل میں کچے کے علاقے سدوجہ میں پانی کا ریلا 150 دیہات میں داخل ہوا لیکن وہاں دیہات کے لوگوں کو نکالنے کے لیے ریسکیو عملہ موجود نہیں۔

(جاری ہے)

بتایا گیا ہے کہ کشمور میں گڈو بیراج کے مقام پر بھی اونچے درجے کی سیلابی صورتحال ہے جس سے پانی کی سطح میں مسلسل اضافہ دیکھنے میں آیا ہے، گزشتہ 24 گھنٹوں کے دوران پانی کی سطح میں 31 ہزار 9 سو 92 کیوسک کا اضافہ ہوا جب کہ دریائے سندھ میں پانی کی سطح بلند ہونے سے ٹھٹھہ سجاول کے مقام سے 2 لاکھ 54 ہزار کيوسک پانی کا بہاؤ ریکارڈ کیا گیا۔ محکمہ اطلاعات سندھ نے بتایا کہ گڈو بیراج پر پانی کا بہاؤ بڑھ کر 5 لاکھ 44 ہزار 658 کیوسک پر آگیا یہاں پانی کا اخراج 5 لاکھ 14 ہزار 51 کیوسک ہے، گڈو بیراج پر 15 ستمبر کو انتہائی اونچے درجے کی سیلابی صورتحال پيدا ہو نے کا خدشہ ہے، سکھر بیراج پر پانی کی آمد 4 لاکھ 70 ہزار 580 کیوسک ریکارڈ کی گئی اور اخراج 4 لاکھ 22 ہزار 400 کیوسک ہے، کوٹری بیراج پر پانی کا بہاؤ 2 لاکھ 62 ہزار 509 کیوسک اور اخراج 2 لاکھ 54 ہزار 354 کیوسک ریکارڈ ہوا جب کہ پنجند پر پانی کی آمد اور اخراج 6 لاکھ 64 ہزار 422 کیوسک ریکارڈ کیا گیا۔