کراچی میں کم عمربچوں کے ریپ کا ملزم گرفتار، 100 سے زائد بچے بچیوں سے زیادتی کا انکشاف

پولیس نے بچوں سے زیادتی کی 200 سے زائد وڈیوز بھی برآمد کرلیں، ملزم نے ناموں کی لسٹ بھی بنا رکھی تھی

ساجد علی ہفتہ 13 ستمبر 2025 11:21

کراچی میں کم عمربچوں کے ریپ کا ملزم گرفتار، 100 سے زائد بچے بچیوں سے زیادتی ..

کراچی ( اُردو پوائنٹ اخبارتازہ ترین۔ 13 ستمبر2025ء ) صوبہ سندھ کے دارالحکومت کراچی میں کم عمر لڑکیوں کے ریپ کے ملزم کو گرفتار کرلای گیا جس کے بارے میں 100 سے زائد بچیوں سے جنسی زیادتی کا انکشاف ہوا ہے۔ میڈیا رپورٹس کے مطابق شہرِقائد کے علاقے قیوم آباد سے گرفتار کیے جانے والے ملزم کے خلاف درج مقدمے میں چائلڈ پورنوگرافی کی دفعات شامل کی گئی ہیں، جوڈیشل مجسٹریٹ جنوبی کی عدالت میں کم عمر بچوں سے مبینہ زیادتی کیس میں پولیس نے ملزم سے تفتیش سے متعلق رپورٹ عدالت میں پیش کی، جس میں بچیوں سے زیادتی کے اس کیس میں ملزم نے دوران تفتیش انکشافات کردیئے۔

بتایا گیا ہے کہ پولیس نے ملزم کے قبضے سے بچوں سے زیادتی کی 200 سے زائد وڈیوز بھی برآمد کی ہیں، اس کے علاوہ کم عمر بچے بچیوں سے زیادتی کرنے والے سفاک ملزم سے کی جانے والی تفتیش کی رپورٹ سامنے آئی ہے، جس میں پولیس نے بتایا کہ ایبٹ آباد کے رہائشی گرفتار ملزم شبیر نے زیادتی کا نشانہ بنانے والے 5 سے 12 سال کے بچوں اور بچیوں کے ناموں کی لسٹ بنا کر رکھی تھی۔

(جاری ہے)

پولیس کی تفتیش سے معلوم ہوا ہے کہ ملزم 2011ء میں کراچی آیا اور اس نے پہلے پرچون کی دکان کھولی جہاں سٹیشنری کا سامان بھی رکھا اور اکثر چھوٹی بچیاں دکان پر آتی تھیں جنہیں وہ رقم کا جھانسہ دے کر گھر لے جاتا، ملزم 2016ء میں قیوم آباد منتقل ہوا اور وہاں شربت کا ٹھیلا لگا لیا، یہاں ملزم 5 سے 12 سال کے کم عمر بچوں سے بدفعلی کرتا رہا، وہ ٹھیلے پر آنے والے بچوں کو انعام کا لالچ دے کر بدفعلی کا نشانہ بناتا تھا۔

پولیس کی جانب سے عدالت مین جمع کرائی جانے والی رپورٹ سے پتا چلا ہے کہ ملزم نے ڈائری میں متاثرہ بچے اور بچیوں کی تفصیل لکھ رکھی تھی، موبائل سے 100 اور یو ایس بی سے 200 سے زائد ویڈیوز ملی ہیں، ایک بچی ملزم کی یو ایس بی موبائل شاپ پر لے گئی جس کے بعد ملزم کا بھانڈا پھوٹ گیا، عدالت نے ملزم شبیر احمد کو 5 روزہ جسمانی ریمانڈ پر پولیس کے حوالے کردیا۔