Live Updates

میڈیا پر مسجد اقصٰی کی دکھائی جانے والی تصویر کے حوالے سے وضاحت

بین الاقوامی میڈیا کی جانب سے ہمیشہ دکھائی جانے والی سنہری گنبد والی عمارت مسجد اقصٰی نہیں ہے، مسجد کی اصل عمارت کا گنبد سرمئی رنگ کا ہے

محمد علی ہفتہ 22 مئی 2021 21:50

مقبوضہ بیت المقدس (اُردو پوائنٹ اخبارتازہ ترین۔ 22 مئی2021ء) میڈیا پر مسجد اقصٰی کی دکھائی جانے والی تصویر کے حوالے سے وضاحت۔ تفصیلات کے مطابق مقبوضہ بیت المقدس اور غزہ میں فلسطینیوں پر اسرائیل کی جانب سے ڈھائے جانے والے مظالم کے بعد مسجد اقصیٰ کی اصل عمارت کے حوالے سے بھی ایک بحث شروع ہوئی جس میں اہم ترین معاملے پر وضاحت کی گئی۔ بتایا گیا ہے کہ میڈیا خاص کر بین الاقوامی میڈیا میں جس عمارت کو بطور مسجد اقصٰی دکھایا جاتا ہے، وہ مسجد اقصٰی کی اصل عمارت نہیں ہے۔

بتایا گیا ہے کہ بین الاقوامی میڈیا کی جانب سے ہمیشہ مسجد اقصٰی کے نام پر دکھائی جانے والی سنہری گنبد والی عمارت دراصل قبۃ الصخرۃ ہے، جبکہ مسجد اقصیٰ کی اصل عمارت کا گنبد سرمئی رنگ کا ہے۔

(جاری ہے)

مسجد اقصیٰ کی اصل عمارت صحن کے جنوبی حصے میں واقع ہے اور اس کا گنبد سرمئی رنگ کا ہے جبکہ قبۃ الصخرۃ صحن کے وسط میں ہے۔

مسجد اقصیٰ بیت المقدس میں ایک پہاڑ کے ٹیلے پر قائم ہے، جس کا کل احاطہ 40 ہزار 104 مربع میٹر ہے۔ واضح رہے کہ مسجد اقصٰی دنیا بھر کے کروڑوں مسلمانوں کیلئے مسجد الحرام، مسجد نبویﷺ کے بعد تیسرا مقدس ترین مقام ہے۔ مسجد اقصٰی کو مسلمان کیلئے قبلہ اول کی حیثیت حاصل ہے۔ مسجد اقصیٰ صدیوں تک مسلمان کے پاس رہنے کے بعد گزشتہ صدی کے دوران قابض اسرائیلیوں کی جانب سے چھین لیا گیا تھا۔ مسجد اقصٰی اور فلسطین پر غیر قانونی قبضے کے بعد سے ظالم صیہونیوں کی جانب سے دہائیوں سے معصوم فلسطینیوں پر مظالم ڈھانے کا سلسلہ جاری ہے۔