زرعی یونیورسٹی فیصل آباد کے 1500 انڈرگریجوایٹ طلباوطالبات کو ہائرایجوکیشن کمیشن کے تعاون سے احساس پروگرام کے تحت سکالرشپ دے دیئے گئے جس میں ان کی ٹیوشن فیس اور اعزازیہ شامل ہے

فیصل آباد (اُردو پوائنٹ اخبارتازہ ترین۔ 11 جون2021ء) زرعی یونیورسٹی فیصل آباد کے 1500 انڈرگریجوایٹ طلباوطالبات کو ہائرایجوکیشن کمیشن کے تعاون سے احساس پروگرام کے تحت سکالرشپ دے دیئے گئے جس میں ان کی ٹیوشن فیس اور اعزازیہ شامل ہے۔ ان باتوں کا اظہار یونیورسٹی کے وائس چانسلر پروفیسر ڈاکٹر انس سرور قریشی نے ڈائریکٹوریٹ آف فنانشل اسسٹنٹس اینڈ یونیورسٹی ایڈوانسمنٹ کے زیراہتمام احساس پروگرام میں سکالرشپ حاصل کرنے والے ذہین اور کم سہولیات کے حامل طلباوطالبات میں چیکوں کی تقسیم کی تقریب سے بطور مہمان خصوصی اپنے خطاب کے دوران کیا۔

انہوں نے کہا کہ حکومت کی جانب سے ریاست مدینہ کو رول ماڈل کے طور پر اپنانے کے جس عزم کا اظہار کیا گیا ہے یہ احساس پروگرام اسی سلسلے کی ایک کڑی ہے۔

(جاری ہے)

انہوں نے مزید کہا کہ حکومت پسماندہ اور غیرمراعات یافتہ علاقوں سے تعلق رکھنے والے طلباوطالبات کو بڑے شہروں اور مراعات یافتہ طبقات کے طلباء کے مقابلے میں آگے لانے کے لئے جو وسائل بروئے کار لا رہی ہے اس سے قابل اور ذہین سکالرز کو ملک کی خدمت کے لئے آگے آنے کے بھرپور مواقع میسر آ سکیں گے۔

ہائرایجوکیشن کمیشن کے یو ایس ایڈ پراجیکٹ ڈائریکٹر راؤ اظہر علی خاں نے اس موقع پر خطاب کرتے ہوئے کہا کہ احساس پروگرام کے تحت اس امر کا خاص خیال رکھا گیا ہے کہ پچاس فیصد تعداد طالبات کی ہونی چاہیے تاکہ انہیں تعلیم و تحقیق کے شعبے میں مردوں کے شانہ بشانہ آگے بڑھنے کے مواقع دستیاب ہوں۔ انہوں نے کہا کہ یو ایس ایڈ پروگرام کے تحت ہائر ایجوکیشن کمیشن اعلیٰ تعلیم کے شعبے میں بھرپور وسائل مہیا کر رہی ہے تاکہ پاکستان میں قابل افراد کو تعلیم و تحقیق کے لئے زیادہ سے زیادہ فائدہ اٹھانے کے مواقع میسر ہوں۔

انہوں نے توقع ظاہر کی کہ یونیورسٹی کے مقابلہ جاتی بنیادوں پر سکالرشپ حاصل کرنے والے سکالرز اپنی صلاحیتوں سے ان وسائل کا صحیح استعمال یقینی بناتے ہوئے اپنے خاندان اور یونیورسٹی کے لئے نیک نامی کا باعث بنیں گے۔ ڈائریکٹر فنانشل اسسٹنٹس اینڈ یونیورسٹی ایڈوانسمنٹ ڈاکٹر جاوید اختر نے کہا کہ احساس پروگرام کے تحت سکالرشپ کے حوالے سے طلباوطالبات کا انتخاب انتہائی کڑے معیارات کے تحت کیا جاتا ہے اور اس امر کو یقینی بنایا جاتا ہے کہ یہ سکالرشپ خالصتاً میرٹ کی بنیاد پر دیئے جائیں۔

انہوں نے کہا کہ ان کا ڈائریکٹوریٹ اس مقصد کے لئے رات دن کوشاں ہے کہ زیادہ سے زیادہ طلباوطالبات کو مرکزی دھارے میں لانے کے لئے انہیں معاشی مدد فراہم کی جا سکے۔ وائس چانسلر پروفیسر ڈاکٹر انس سرور قریشی نے سکالرشپ حاصل کرنے والے طلباوطالبات میں راؤ اظہر علی خاں اور ڈاکٹر جاوید اختر کے ہمراہ چیک تقسیم کئے۔